రాజమౌళిని ఫాలో అవుతున్న రణబాలి

సినిమా లవర్స్‌కు సినిమా తెర వెనుక సంగతుల మీద కూడా అమితాసక్తి ఉంటుంది. ఘనవిజయం సాధించిన సినిమాలకు సంబంధించి మేకింగ్ విశేషాలను తెలుసుకోవడానికి బాగా ఇంట్రెస్ట్ చూపిస్తారు. ‘మగధీర’తో తెలుగు సినిమాను ఎన్నో మెట్లు ఎక్కించిన రాజమౌళి.. అప్పట్నుంచో తాను తీసే భారీ చిత్రాలకు సంబంధించి మేకింగ్ వీడియోలు తీయించడం అలవాటు చేసుకున్నాడు.

మగధీర, ఈగ, బాహుబలి, ఆర్ఆర్ఆర్.. వీటి మేకింగ్ వీడియోలు ప్రేక్షకులను ఎంతో ఆకట్టకున్నాయి. ఐతే రాజమౌళి సినిమాలంటే వాటి స్థాయి వేరు. వాటి ఫలితాలు వేరు. కాబట్టి ప్రేక్షకులు వాటి పట్ల అదే స్థాయిలో ఆసక్తి ప్రదర్శిస్తారు. వేరే సినిమాల విషయంలోనూ అంత ఇంట్రెస్ట్ చూపిస్తారా లేదా అన్నది చెప్పలేం.

కానీ ‘రణబాలి’ టీం తమ సినిమా మీద ఎంతో కాన్ఫిడెన్స్‌తో రాజమౌళి రూట్‌ను ఫాలో అయిపోతోంది. ఈ సినిమా మేకింగ్ మీద ఒక భారీ డాక్యుమెంటరీ తీసింది టీం. అది ఏకంగా నాలుగు సిరీస్‌లుగా రాబోతోందట. ఈ విషయాన్ని నిర్మాణ సంస్థ మైత్రి మూవీ మేకర్స్ అధికారికంగా ప్రకటించింది.

ఈ సినిమా రేంజికి డాక్యుమెంటరీ తీయడమే ఆశ్చర్యమంటే.. అది నాలుగు సిరీస్‌లుగా వస్తుందని ప్రకటించడం పట్ల అందరూ ఆశ్చర్యపోతున్నారు. ఈ సినిమా మేకింగ్‌లో అన్ని విశేషాలున్నాయా.. సినిమా బాక్సాఫీస్ దగ్గర అంత అద్భుతం చేస్తుందని టీం నమ్ముతోందా.. ఈ చిత్రానికి అంతుందా అని చర్చించుకుంటున్నారు నెటిజన్లు.

ఐతే రాహుల్ సంకృత్యన్ సామాన్యుడైన దర్శకుడేమీ కాదు. ట్యాక్సీవాలా, శ్యామ్ సింగరాయ్ చిత్రాలతో తనేంటో చూపించాడు. ముఖ్యంగా ‘శ్యామ్ సింగరాయ్’ సినిమాను అతను డీల్ చేసిన విధానం తనపై అంచనాలు పెంచింది. ‘రణబాలి’ మీద మైత్రి సంస్థ విజయ్ మార్కెట్ స్థాయికి మించి భారీగా ఖర్చు పెట్టింది.

ఈ సినిమా ప్రోమోలు కూడా ప్రత్యేకమైన సినిమా చూడబోతున్న సంకేతాలు కనిపించాయి. మరి సినిమా అంచనాలకు తగ్గట్లు ఉండి బాక్సాఫీస్ దగ్గర మంచి ఫలితం అందుకుంటుందా అన్నది చూడాలి. అది జరిగితేనే ఈ డాక్యుమెంటరీ సిరీస్‌ పట్ల ప్రేక్షకుల్లో ఆసక్తి ఉంటుంది. రిజల్ట్ తేడా కొడితే మాత్రం ఈ సినిమాకు మళ్లీ డాక్యుమెంటరీనా అనే కౌంటర్లు పడతాయి.