రాకా రికార్డులు అప్పుడే మొదలైపోయాయి

ఐకాన్ స్టార్ అల్లు అర్జున్, దర్శకుడు అట్లీ కలయికలో తెరకెక్కుతున్న రాకా విడుదల చాలా దూరంలో ఉండగానే రికార్డుల వేట మొదలుపెట్టింది. మొట్టమొదటిసారి ఒకేచోట ఒకేసారి 37 ఆర్టిస్టులతో మోషన్ క్యాప్చర్ టెక్నాలజీ వాడి యాక్షన్ ఎపిసోడ్ చేయడం గిన్నిస్ బుక్ అఫ్ వరల్డ్ రికార్డును సంపాదించుకుంది. పుష్పతో టాలీవుడ్ లో మొదటి జాతీయ అవార్డు అందుకున్నట్టే బన్నీ ఖాతాలో మరో మైలురాయి తోడయ్యింది. మేకింగ్ ఎలా జరిగిందో వీడియో రిలీజ్ చేశారు.

నాలుగు నిమిషాల ఫుటేజ్ లో ఈ ఆలోచనకు అంకురార్పణ ఎలా జరిగింది, స్టూడియో సెటప్ ఎలా చేసుకున్నారు, విదేశీ నిపుణులు ఎవరెవరు పాల్గొన్నారు లాంటివన్నీ ఇందులో పొందుపరిచారు. అట్లీ, బన్నీ స్వయంగా వివరించిన విశేషాలు ఉన్నాయి. మోషన్ క్యాప్చర్ అనేది చాలా క్లిష్టమైన ప్రక్రియ. గతంలో విక్రమసింహ, రోబో లాంటి చిత్రాల్లో వాడారు. అవి మెయిన్ ఆర్టిస్టులకే పరిమితం చేశారు. కానీ రాకా అలా కాదు. చిన్నా పెద్దా కలిపి ఒకేసారి 37 మంది మీద చేసింది.

నిజానికి ఏదైనా టీజర్ వస్తుందని ఫ్యాన్స్ తెగ ఎదురు చూశారు. అట్లీ బర్త్ డే కాబట్టి దానికి అనుగుణంగా ఒకటి రెండు నిమిషాల విజువల్ కంటెంట్ వస్తుందేమోనని ఆశపడ్డారు. అయితే అట్లీ ఇప్పుడప్పుడే ఆ ఆలోచనలో లేడు. రిలీజ్ ఇంకా కన్ఫర్మ్ కాలేదు. 2027లో సాధ్యమవుతుందా లేదానే దాని మీద బోలెడు అనుమానాలున్నాయి. చూస్తుంటే 2028లోనే రిలీజ్ ఎక్స్ పెక్ట్ చేయొచ్చు. అలాంటప్పుడు ఇంత ముందుగా టీజర్లు ఇచ్చే సాహసాలు ఎవరూ చేయరు.

దీపికా పదుకునే హీరోయిన్ గా నటిస్తున్న రాకాలో మృణాల్ ఠాకూర్, రష్మిక మందన్న, జాన్వీ కపూర్ కూడా ఉన్నారని ముందు నుంచి లీక్స్ వస్తూనే ఉన్నాయి కానీ అఫీషియల్ గా టీమ్ నుంచి ఎలాంటి ప్రకటన రాలేదు. హాలీవుడ్ స్టాండర్డ్స్ లో రూపొందుతున్న రాకాని సన్ పిక్చర్స్ చాలా పెద్ద బడ్జెట్ తో నిర్మిస్తోంది. సాయి అభ్యంక్కర్ సంగీతం మీద ఓ రేంజ్ లో అంచనాలున్నాయి. జవాన్ తర్వాత అట్లీ చేస్తున్న మూవీ ఇదే. రెండు భాగాలు ఉంటుందనే ప్రచారమైతే ఇండస్ట్రీల్లో జోరుగా ఉంది.