తెలంగాణ యాసపై ట్రోల్స్… ర‌ష్మిక రియాక్ష‌న్

సోష‌ల్ మీడియా జ‌నాలు దేనికి ఎప్పుడు ట్రిగ్గ‌ర్ అవుతారో తెలియ‌దు. ఎవ‌రి మ‌నోభావాలు ఎందుకు, ఎలా దెబ్బ తింటాయో అర్థం కాదు. ముఖ్యంగా ఫిలిం సెల‌బ్రెటీల మీద ఉండే విప‌రీత‌మైన ఫోక‌స్ వ‌ల్ల‌.. ఏ చిన్న అవ‌కాశం వ‌చ్చినా ట్రోల్స్‌తో మీద ప‌డిపోతుంటారు. ఈ మ‌ధ్య యాక్ట‌ర్లు సినిమాల్లో త‌మ పాత్ర‌ల కోసం ఉప‌యోగించే భాష‌.. బ‌య‌ట మాట్లాడే యాస మీద కూడా జ‌నాలు దృష్టిపెడుతున్నారు. అందులో కూడా లోపాలు వెతికి ట్రోల్ చేస్తున్నారు.

బేసిగ్గా క‌న్న‌డ అమ్మాయి అయినా.. తెలుగులో ఎక్కువ సినిమాలు చేయ‌డంతో పాటు విజ‌య్ దేవ‌ర‌కొండ‌ను పెళ్లి చేసుకోవ‌డం ద్వారా ఇక్క‌డి అమ్మాయి అయిపోయింది ర‌ష్మిక మంద‌న్నా. ఆమె ఇప్ప‌టికే తెలుగు బాగా నేర్చేసుకుంది. ఐతే విజ‌య్‌తో క‌లిసి ఉండ‌డం వ‌ల్లో ఏమో.. ఈ మ‌ధ్య తెలంగాణ యాస కొంచెం అల‌వాట‌వుతోంది. ర‌ష్మిక కూడా ఆ యాస‌లో మాట్లాడే ప్ర‌య‌త్నం చేస్తున్న‌ట్లు క‌నిపిస్తోంది.

ఈ క్ర‌మంలో కొన్ని త‌ప్పులు కూడా జ‌ర‌గొచ్చు. కానీ ఆమెది ఫేక్ తెలంగాణ యాక్సెంట్ అంటూ ఇటీవ‌ల సోష‌ల్ మీడియాలో కొంద‌రు టార్గెట్ చేయ‌డం మొద‌లుపెట్టారు. ఆనంద్ దేవ‌ర‌కొండ సినిమా ఎపిక్ ప్ర‌మోష‌న‌ల్ ఈవెంట్‌కు వ‌చ్చిన‌పుడు ర‌ష్మిక యాస మీద పెద్ద డిస్క‌ష‌న్ పెట్టేశారు సామాజిక మాధ్య‌మాల్లో.

త‌న‌ను ఈ విష‌యంలో ట్రోల్ చేస్తున్న విష‌యం ర‌ష్మికకు తెలిసిందో లేదో కానీ.. తాజాగా మైసా మూవీ టీజ‌ర్ లాంచ్ ఈవెంట్లో కొంద‌రు త‌న యాస గురించి ప్ర‌స్తావించారు. తెలంగాణ యాస వ‌చ్చేసిన‌ట్లుందే అంటూ కామెంట్ చేయ‌గా.. కొంద‌రు ప‌రోక్షంగా ట్రోల్స్ గురించి కూడా ప్ర‌స్తావించారు. దాని గురించి ర‌ష్మిక స్పందిస్తూ.. తాను ఏ యాస‌లో మాట్లాడినా స‌రే, చెప్పాల‌నుకునే విష‌యం అర్థ‌మ‌వుతోంది క‌దా.. అది చాలు అంటూ ఆ వివాదానికి తెర‌దించే ప్ర‌య‌త్నం చేసింది.

ఇక మైసా సినిమా కోసం ప‌డ్డ క‌ష్టం గురించి ర‌ష్మిక మాట్లాడుతూ.. గ‌ర్ల్ ఫ్రెండ్ సినిమా కోసం తన ఎమోష‌న్ అంతా ఇచ్చేశాన‌ని, మైసా కోసం ఏకంగా లైఫ్ అంతా ఇచ్చేశాన‌ని వ్యాఖ్యానించింది. ఈ సినిమాలో త‌న‌తో ఎన్నెన్నో చేయించార‌ని.. అది మామూలు క‌ష్టం కాద‌ని ఆమె వ్యాఖ్యానించింది. అండ‌ర్ వాట‌ర్ సీక్వెన్స్ చేయ‌మ‌న్నార‌ని.. త‌న‌కు ఈత వ‌చ్చు కాబ‌ట్టి ఓకేలే అనుకున్నాన‌ని, కానీ 8 గంట‌ల పాటు నీటిలో ఉండాల‌ని చెబితే త‌నేమైనా చేప‌నా అనిపించింద‌ని ఆమె చ‌మ‌త్క‌రించింది. మైసా న‌వంబ‌రు 27న ప్రేక్ష‌కుల ముందుకు రానుంది.