డాల‌స్‌ థియేట‌ర్లో తెలుగు మెనూ

తెలుగు వాళ్లు అమెరికాకు వెళ్లి సెటిల్ కావ‌డం అన్న‌ది చాలా మామూలు విష‌యం అయిపోయింది ఈ రోజుల్లో. అక్క‌డ ఏ రాష్ట్రానికి వెళ్లినా.. ఏ సిటీలో అడుగుపెట్టినా తెలుగు వాళ్లు క‌నిపిస్తారు. తెలుగు హోట‌ళ్లు ద‌ర్శ‌న‌మిస్తాయి.

ముఖ్యంగా డాల‌స్ సిటీలో తెలుగు వారి హ‌వా మామూలుగా ఉండ‌దు. అడుగ‌డుగునా తెలుగు కుటుంబాలుండే ఆ సిటీని డాల‌స్ పురం అని కూడా స‌రదాగా పిలుచుకుంటుంటారు మ‌న వాళ్లు. ఆ సిటీలో పెద్ద ఎత్తున తెలుగు హోట‌ళ్లుంటాయి. హోట‌ళ్ల‌కు అచ్చ తెలుగు పేర్లు పెట్టుకుంటారు. అక్క‌డ‌ తెలుగు భాష‌లో మెనూలు కూడా చూడొచ్చు.

ఐతే తెలుగు వాళ్లు పెట్టుకున్న హోట‌ళ్ల‌లో తెలుగు మెనూలుండ‌డం మామూలే కానీ.. నేటివ్ అమెరిక‌న్స్ న‌డిపే ప్ర‌ఖ్యాత థియేట‌ర్ ఛైన్లో తెలుగు లిపిలో మ‌న వంట‌కాల‌తో మెనూ ఉండ‌డం మాత్రం సామాన్య విషయం కాదు. ప్ర‌ముఖ థియేట‌ర్ ఛైన్ సినీ మార్క్ ఇలాగే చేసి అంద‌రినీ ఆశ్చ‌ర్యానికి గురి చేసింది. త‌మ థియేట‌ర్ ఛైన్లో ప్రేక్ష‌కుల‌కు అందుబాటులో ఉంచే ఆహార ప‌దార్థాల జాబితాలో తెలుగు వంట‌కాల‌ను జోడించింది సినీ మార్క్.

అంతే కాక తెలుగులో ఫుడ్ ఐటెమ్స్ వివ‌రాలు రాసి.. మెనులో ప్ర‌త్యేకంగా తెలుగు లిపిలోనే ముద్రించింది. దీనికి సంబంధించిన వీడియో ఇప్పుడు సోష‌ల్ మీడియాలో వైర‌ల్ అవుతోంది. డాల‌స్ న‌గ‌రాన్ని డాల‌స్ పురం అన‌డంలో అతిశ‌యోక్తి లేద‌ని.. అక్క‌డ తెలుగు వారి హ‌వాకు ఇది నిద‌ర్శ‌న‌మ‌ని.. మ‌న వాళ్ల‌కు అమెరిక‌న్స్ ఇచ్చే ప్రాధాన్యానికి కూడా ఇది రుజువు అని నెటిజ‌న్లు కామెంట్లు చేస్తున్నారు.

యుఎస్ ఇప్పుడు తెలుగు సినిమాల‌కు పెద్ద మార్కెట్‌గా మార‌గా.. డాలస్ న‌గ‌రంలో మ‌న సినిమాలు పెద్ద ఎత్తున రిలీజై, బంప‌ర్ క‌లెక్ష‌న్లు సాధిస్తుంటాయి.