అనుపమ కరెక్టే అన్న శంకర కూతురు

అనుపమ పరమేశ్వరన్.. ఈ మలయాళ కథానాయిక వ్యక్తిగత వ్యవహారం గత కొన్ని రోజులుగా సోషల్ మీడియాను ముంచెత్తుతున్న సంగతి తెలిసిందే. ఒక తమిళ సినిమా చేస్తున్న టైంలో ఆ కథానాయకుడితో ప్రేమలో పడ్డ ఆమె.. అతడితో రెండేళ్లు ప్రయాణం చేసింది. కానీ అతడితో అభిప్రాయ భేదాలు వచ్చి ఈ ఏడాది తన నుంచి విడిపోయింది. ఐతే తనతో రిలేషన్‌షిప్‌లో ఉన్నంత కాలం ఏమీ మాట్లాడని అనుపమ.. బ్రేకప్ తర్వాత తన ఎక్స్‌ లవర్ మీద అనేక ఆరోపణలు చేస్తోంది.

అదొక టాక్సిక్ రిలేషన్‌షిప్ అని.. అతడి వల్ల మానసిక వేదన అనుభవించానని.. తనను కాపాడాల్సిన వాడే నాశనం చేయాలని చూశాడని.. అతడి వల్ల తన ఆరోగ్యం కూడా దెబ్బ తిందని.. అతను తన పీరియడ్స్ మీద కూడా తీవ్ర అభ్యంతరకర వ్యాఖ్యలు చేశాడని.. ఇలా ఎన్నో ఆరోపణలు చేసింది అనుపమ. ఐతే ఎక్కడా పేరు ప్రస్తావించకపోయినా.. ఆమె ఆరోపణలన్నీ ఆ తమిళ యువ హీరోనే అన్నది ఓపెన్ సీక్రెట్. దీనిపై ఇటీవల అతను కూడా ఇన్‌డైరెక్ట్‌గా స్పందించాడు కూడా.

ఐతే సోషల్ మీడియాలో చాలామంది అనుపమ వైపే ఉండగా.. కొందరు అతడి వైపు నిలుస్తున్నారు. ఈ వ్యవహారాన్ని ఒకవైపే చూడడం కరెక్ట్ కాదంటున్నవాళ్లూ ఉన్నారు. సినీ ప్రముఖుల్లో మాత్రం ఎవ్వరూ దీని మీద ఇప్పటిదాకా స్పందించలేదు. ఇది వ్యక్తిగత వ్యవహారం కాబట్టి అలా మౌనం వహిస్తున్నారు. ఐతే తమిళ లెజెండరీ డైరెక్టర్ శంకర్ తనయురాలు, కథానాయిక అదితి శంకర్ మాత్రం ఒక ఇంటర్వ్యూలో ఈ వ్యవహారం మీద స్పందించింది. ఆమె హీరోని ఏమీ నిందించకుండానే, అనుపమ ఇలా మాట్లాడడాన్ని కొనియాడింది.

‘‘ఈ మధ్య నేను ఒక ఇంటర్వ్యూ చూశాను. దాని మీద జనాలకు భిన్నాభిప్రాయాలు ఉండొచ్చు. కానీ నాకు మాత్రం ఆమె జనాల్లో ఎంతో అవగాహన తీసుకొచ్చినట్లు అనిపించింది. రిలేషన్‌షిప్‌‌లో ఇలాంటి అనుభవాలు ఎదుర్కొంటున్న వాళ్లు తాము కూడా ఇందులో భాగం అని తెలుసుకునేలా చేసింది. ఆమె కథలో నిజాయితీ ఉందనిపించింది. ఆమెకు అవతలి వ్యక్తిని తక్కువ చేయడం ఉద్దేశం కాదనుకుంటున్నా. నేనిక్కడ తీసుకోవాలనుకుంటున్న విషయం.. ఆమె ఇతరులలో అవగాహన పెంచే ప్రయత్నం చేయడం’’ అంటూ అనుపమ పేరు పెట్టకుండా ఆమెను కొనియాడింది అదితి.