ఇన్‌స్టా సబ్‌స్క్రిప్షన్‌… ఒక్క ముక్కలో తేల్చేసిన హీరోయిన్

ఇన్‌స్టాగ్రామ్‌లో సెలబ్రిటీల పెయిడ్ సబ్‌స్క్రిప్షన్స్ గురించి ఈమధ్య సోషల్ మీడియాలో రకరకాల కామెంట్స్ వినిపిస్తున్న విషయం తెలిసిందే. నెలకు కొంత మొత్తం తీసుకుని సబ్‌స్క్రైబర్స్‌కు మాత్రమే ఫొటోలు, రీల్స్ లేదా ఇతర కంటెంట్ ఇవ్వడంపై ఒక్కొక్కరు ఒక్కోలా మాట్లాడుతున్నారు. కొందరు ఇలాంటి కంటెంట్ కోసం డబ్బులు ఎందుకు కట్టాలని ప్రశ్నిస్తుంటే, మరికొందరు అది క్రియేటర్‌కు ఇన్‌స్టాగ్రామ్ ఇచ్చిన ఆప్షన్ అని అంటున్నారు.

ఈ టాపిక్ మీద సినిమా హీరోయిన్లు పెద్దగా రియాక్ట్ అవ్వడం కనిపించలేదు. కానీ నటి రాశి సింగ్ మాత్రం తన అభిప్రాయం చెప్పింది. ఇన్‌స్టాగ్రామ్ సబ్‌స్క్రిప్షన్స్‌లో తనకు తప్పేమీ కనిపించడం లేదని తెలిపింది. ఎవరి అకౌంట్ వాళ్లది, ఏం చేయాలనేది వాళ్ల ఇష్టమని చెప్పింది. ఎవరికైనా అది నచ్చకపోతే సబ్‌స్క్రైబ్ కాకుండా ఉండొచ్చని సింపుల్‌గా సమాధానం ఇచ్చింది.

అయితే ఇటీవల కొందరు నటీమణులు, ఇన్‌ఫ్లూయెన్సర్ల సబ్‌స్క్రిప్షన్ ధరలు, అందులో పెట్టే ఫొటోలు సోషల్ మీడియాలో బయటకు రావడంతోనే చర్చ మరో వైపు వెళ్లింది. సబ్‌స్క్రిప్షన్ పెట్టిన ప్రతి ఒక్కరూ ఒకే రకమైన కంటెంట్ ఇవ్వడం లేదు. ఒక్కో క్రియేటర్ దాన్ని ఒక్కో విధంగా వాడుకుంటున్నారు.. అదే సమయంలో డబ్బులు చెల్లించేది కూడా సబ్‌స్క్రైబర్ ఇష్టమే కదా అనే వాదన మరోవైపు వినిపిస్తోంది.

ఇందులో రెండింటికీ ఒక సింపుల్ లెక్క ఉంది. క్రియేటర్ తన కంటెంట్‌కు ధర పెట్టుకోవచ్చు. అది విలువైనదే అనిపిస్తే ఫాలోవర్ డబ్బులు కట్టి చూడొచ్చు. నచ్చకపోతే వదిలేయొచ్చు. అయితే పెయిడ్ కంటెంట్ పేరుతో ఏం పెట్టినా ఓకే అనే అర్థం కూడా కాదు. ఇన్‌స్టాగ్రామ్ కమ్యూనిటీ గైడ్‌లైన్స్ అక్కడ కూడా వర్తిస్తాయి. రాశి సింగ్ చెప్పింది కూడా దాదాపు ఇదే పాయింట్ దగ్గర ఆగిపోయింది. ఎవరినీ తప్పు పట్టలేదు, అలాగే సబ్‌స్క్రిప్షన్స్‌ను గొప్పగా సమర్థించలేదు. ఇష్టం ఉంటే తీసుకోండి, లేకపోతే వద్దు అన్నట్టుగా తన సమాధానం ఇచ్చింది. ఈ టాపిక్ మీద సోషల్ మీడియాలో పెద్ద పెద్ద వాదనలు నడుస్తున్న సమయంలో రాశి మాత్రం విషయాన్ని అంత కాంప్లికేట్ చేయకుండా ఒక లైన్‌లో తేల్చేసింది.