అనుష్క సినిమా అడ్రెస్ లేదేంటి

నాలుగు నెలల క్రితం అనుష్క కొత్త మలయాళం మూవీ ‘కథనార్ – ది వైల్డ్ సోర్సెరర్’ ప్రమోషన్లు మొదలయ్యాయి. ట్రైలర్ అన్ని భాషల్లో బయటికొచ్చింది. అర్థమయ్యీ కానట్టు విచిత్రమైన అనుభూతి కలిగించినా ఒక విజువల్ గ్రాండియర్ గా రూపొందిందనే క్లారిటీ జనాలకు వచ్చింది. ఈ ప్యాన్ ఇండియా సినిమా అధికారిక ప్రకటన 2023లో వచ్చింది. షూటింగ్ కూడా ఆ ఏడాదే మొదలుపెట్టారు. ఇప్పటికి మూడు సంవత్సరాలు గడిచిపోయాయి. అయినా సరైన అప్డేట్స్ రావడం లేదు.  

హోమ్ అనే చిన్న బడ్జెట్ చిత్రం తీసి ప్రశంసలు అందుకున్న రోజిన్ థామస్ దర్శకత్వం వహించిన కథనార్ – ది వైల్డ్ సోర్సెరర్ రెండు భాగాలుగా తీస్తున్నారని మల్లువుడ్ టాక్. భారతీయ భాషలతో పాటూ ఇంటర్నేషనల్ లాంగ్వేజెస్ లో రిలీజ్ ప్లాన్ చేస్తున్నారు. తొమ్మిదవ శతాబ్దానికి చెందిన కదమట్టత్తు కథనార్ మహా పోరాట వీరుడు, మంత్రశక్తులు కలిగిన పూజారి. అతని కథే ఇప్పుడీ సినిమా. అనుష్క పోషిస్తున్న నీల క్యారెక్టర్ కథలో చాలా కీలకంగా ఆసాంతం ఉంటుంది.

హీరోగా నటించిన జయసూర్యకు బయట మార్కెట్లలో ఇమేజ్ లేకపోవడం ప్రతిబంధకంగా మారినట్టు కనిపిస్తోంది. ట్రైలర్ తర్వాత డిమాండ్ అనూహ్యంగా పెరుగుతుందననుకుంటే దానికి భిన్నంగా పెద్దగా సౌండ్ చేయకపోవడం ఫ్యాన్స్ ని ఆశ్చర్యపరుస్తోంది. ప్రముఖ నిర్మాత గోకులం గోపాలన్ నిర్మించిన కథానార్ కు మోక్షం ఎప్పుడు దక్కుతుందో అంతు చిక్కడం లేదు. 2026లో మిగిలిన అయిదు నెలల మెయిన్ స్లాట్స్ అన్నీ ఇతర సినిమాలు లాక్ చేసుకున్నాయి.

దీని సంగతలా ఉంచితే ఘాటీ దారుణంగా డిజాస్టర్ అయ్యాక అనుష్క మళ్ళీ కనిపించలేదు. ఆ సినిమా ప్రమోషన్లకు సైతం దూరంగా ఉంది. పెళ్లి వార్త గురించి కొన్ని గాసిప్స్ వినిపించినా తర్వాత అవన్నీ ఉత్తివేనని తేలిపోయింది. అనుష్క వయసు నాలుగు పదులు దాటిపోయింది. ఇప్పటికైనా వివాహ జీవితంలోకి అడుగు పెట్టాలని అభిమానులు కోరుకుంటున్నారు కానీ దానికి సంబంధించి అప్డేట్ అయితే రావడం లేదు. పోనీ కథానార్ సస్పెన్స్ కైనా చెక్ పెడతారేమో చూడాలి.