అసలు గుడ్ న్యూస్ ఎప్పుడు నిఖిల్

టాలీవుడ్ లో కొన్ని ప్యాన్ ఇండియా సినిమాల సంకట స్థితి అంతా ఇంతా కాదు. విడుదల తేదీ తేల్చకుండా, అభిమానుల అయోమయాన్ని కొనసాగిస్తూ నిత్యం సంఘర్షణ పడుతూనే ఉన్నాయి. వాటిలో స్వయంభు ఒకటి. షూటింగ్ ఎప్పుడో అయిపోయింది. అప్పట్లో ఫిబ్రవరి రిలీజ్ అంటూ ఒక డేట్ ఇచ్చారు. తర్వాత ఏప్రిల్ అన్నారు. అటుపై ఇంకే ఊసు లేదు. వాయిదాలు పడుతూనే ఉన్నాయి కానీ టీమ్ సైలెంట్ గా ఉండిపోయింది. అదిగో ఇదిగో అనడం తప్పించి నిఖిల్ క్లియర్ గా చెప్పడం లేదు.

స్వయంభు మూవీ నిఖిల్ కు చాలా ప్రతిష్టాత్మకంగా మారిన సినిమా. కార్తికేయ 2 నార్త్ లోనూ బ్లాక్ బస్టర్ కొట్టి గుర్తింపు తెచ్చింది. దాన్ని స్థిరపరిచేది ఈ సినిమానే అన్నది తన స్థిర నమ్మకం. అయితే ఓటిటి డీల్ ఇంకా అవ్వకపోవడం వల్లనో లేక విఎఫ్ఎక్స్ క్వాలిటీ ఇంకా ఆశించిన స్థాయిలో రావడం లేదనో కారణం ఏదైతేనేం నెలలు గడిచిపోతున్నాయి కానీ అసలైన గుడ్ న్యూస్ మాత్రం బయటికి రావడం లేదు. ఫ్యాన్స్ ప్రశ్నకు నిఖిల్ రెడీ అని రెడీ మేడ్ సమాధానం ఇస్తున్నాడు.

2026లో ఇంకో  నాలుగు నెలలు మాత్రమే ఉన్నాయి. ఇరుముడి, టాక్సిక్, ప్యారడైజ్, సర్దార్ 2, ఎపిక్, ఆదర్శ కుటుంబం, వీసా, జైలర్ 2, విశ్వంభర, రణబాలి, రామాయణ, ఫౌజీ, కింగ్ అంటూ చిన్నా పెద్ద సినిమాలు వరసగా క్యూ కట్టి ఉన్నాయి. అటు సంక్రాంతి ఆల్రెడీ పిచ్చ టైట్ అయిపోయింది. మరి స్వయంభు మనసులో ఏముందో అంతు చిక్కడం లేదు. సెప్టెంబర్ ఆప్షన్ బాగానే ఉంది కానీ ప్యారడైజ్ కన్నా కనీసం రెండు వారాల ముందు వస్తే మంచి వసూళ్లు అందుకోవచ్చు.

ఇదంతా అయ్యేపని కాదనుకుంటే 2027 మార్చి లేదా అటుపై సమ్మర్ కు వెళ్లాల్సి ఉంటుంది. ఇప్పటికే బజ్ తగ్గినట్టు కనిపిస్తున్న స్వయంభుకి భరత్ కృష్ణమాచార్య దర్శకత్వం వహించారు. సెంథిల్ కుమార్ ఛాయాగ్రహణం సమకూర్చగా రవి బస్రూర్ సంగీతం అందించారు. సంయుక్త మీనన్, నభ నటేష్ హీరోయిన్లు కాగా క్యాస్టింగ్ పెద్దదే ఉంది. ఇలాంటి సమస్యతోనే ఇబ్బంది పడిన సంబరాల ఏటిగట్టు జనవరి 12 తీసేసుకుంది. మరి స్వయంభు ఏం చేస్తాడో చూడాలి.