ఇండియాలో మరో హాలీవుడ్ దెయ్యం

ఈమధ్య హాలీవుడ్ హారర్ సినిమాలకు కూడా మళ్ళీ క్రేజ్ పెరుగుతోంది. పెద్దగా స్టార్ కాస్ట్ లేని ‘అబ్సెషన్’ సినిమా మన దగ్గర ఏకంగా 100 కోట్ల నెట్ వసూలు చేసి రికార్డులు క్రియేట్ చేసింది. పోయిన నెలలో వచ్చిన ‘ఈవిల్ డెడ్ బర్న్’ కూడా ఫస్ట్ వీక్‌లోనే 25 కోట్ల గ్రాస్ కొట్టేసింది. ఈ దెయ్యాల ట్రెండ్‌ను కంటిన్యూ చేస్తూ ఇప్పుడు ‘ఇన్సిడియస్: అవుట్ ఆఫ్ ది ఫర్దర్’ ఆగస్టు 21న థియేటర్లలోకి వస్తోంది. పైగా ఈసారి మొదటి రోజే తెలుగు వెర్షన్ కూడా దించుతున్నారు.

ఒకప్పుడు హాలీవుడ్ సినిమాలు అమెరికాలో రిలీజై, అక్కడ హిట్ అయ్యాక మన దగ్గరకు వచ్చేవి. కానీ ఇన్సిడియస్ కు ఆ పరిస్థితి లేదు. అమెరికాతో పాటే మన దగ్గర కూడా ఆగస్టు 21నే విడుదల చేస్తున్నారు. ఇంగ్లీష్‌తో పాటు తెలుగు, హిందీ, తమిళ భాషల్లో ఒకేసారి ప్రేక్షకుల ముందుకు రాబోతోంది. గతంలో ఇలాంటి సినిమాలకు హైదరాబాద్ లో ఇంగ్లీష్ షోలు వెతుక్కోవాల్సి వచ్చేది. ఇప్పుడు ట్రెండ్ మారింది, సోనీ సంస్థ ఏకంగా తెలుగు ట్రైలర్ కట్ చేసి మరీ ప్రమోషన్స్ చేస్తోంది.

హారర్ లవర్స్ కు ‘ఇన్సిడియస్’ ఫ్రాంచైజీ గురించి ప్రత్యేకంగా చెప్పాల్సిన పనిలేదు. 2010లో మొదలైన ఈ సిరీస్‌లో ఇప్పటికే ఐదు సినిమాలు వచ్చి ప్రపంచవ్యాప్తంగా 740 మిలియన్ డాలర్ల పైనే కలెక్ట్ చేశాయి. 2023లో ‘ది రెడ్ డోర్’ తర్వాత వస్తున్న ఈ ఆరో పార్ట్ లో పాత లాంబర్ట్ ఫ్యామిలీని పక్కనపెట్టి ఓ కొత్త కుటుంబాన్ని తీసుకొచ్చారు. జెమ్మా అనే తల్లి ‘ది ఫర్దర్’ అనే దెయ్యాల ప్రపంచంలోకి వెళ్లడం, అక్కడి ఆత్మలను మన ప్రపంచంలోకి తీసుకురావడం ఈ కొత్త కథలో మెయిన్ పాయింట్.

బాక్సాఫీస్ దగ్గర ‘అబ్సెషన్’ రిజల్ట్ చూశాక హారర్ జానర్ సత్తా ఏంటో అందరికీ అర్థమైంది. ఇప్పుడు వస్తున్న ‘ఇన్సిడియస్’కు ఆ ఫ్రాంచైజీ బ్రాండ్ ఇమేజ్ బాగా ప్లస్ అవుతుంది. జేకబ్ చేజ్ డైరెక్ట్ చేసిన ఈ సినిమాలో అమీలియా ఈవ్ లీడ్ రోల్ చేయగా, ఎలిస్ క్యారెక్టర్ లో లిన్ షే మళ్లీ భయపెట్టబోతోంది. అయితే ఇది ఆరో పార్ట్ కావడంతో పాత సినిమాలు చూడని వాళ్లు కనెక్ట్ అవుతారా అనే చిన్న డౌట్ ఉంది. కానీ కొత్త ఫ్యామిలీ చుట్టూ కథ రాసుకున్నారు కాబట్టి ఆ ఇబ్బంది ఉండకపోవచ్చు.