మాస్ ప్రేక్షకులకు ‘ముడి’ వేస్తే చాలు

ఈ వారం విడుదల కాబోతున్న ఇరుముడికి మంచి ఓపెనింగ్ దక్కడం ఖాయం. మాస్ మహారాజా ట్రాక్ రికార్డు పక్కన పెడితే వాటి ప్రభావం కన్నా ఎక్కువగా అయ్యప్పస్వామి ఎలిమెంట్ ఏదైతే హైలైట్ చేస్తూ వచ్చారో, అది సానుకూలంగా పని చేసేలా ఉంది. ఇది భక్తి సినిమా కాదని, దీక్ష వేసుకోవడం కథలో ఒక భాగంగా మాత్రమే వస్తుందని దర్శకుడు శివ నిర్వాణ పదే పదే క్లారిటీ ఇవ్వడం చూస్తే, ప్రేక్షకుల మనసులో దీని గురించి సరైన అంచనాలు ఏర్పడాలనే ఉద్దేశం కనిపిస్తోంది.

ముఖ్యంగా ఇరుముడి కనెక్ట్ కావాల్సింది మాస్ ప్రేక్షకులకు. వాళ్ళను కనక మెప్పిస్తే కలెక్షన్ల వర్షం ఖాయం. లెనిన్ చేసింది ఇదే. అయితే అఖిల్ ఇమేజ్ తో పోల్చుకుంటే రవితేజ ఫాలోయింగ్ పెద్దది, అందులోనూ ఫ్యామిలీ ఆడియన్స్ మద్దతు ఉంటుంది కాబట్టి నెంబర్లు భారీగా వస్తాయి. మైత్రి మూవీ మేకర్స్ నిర్మించిన ఈ ఎమోషనల్ యాక్షన్ డ్రామాలో ప్రియాంకా భవాని శంకర్ హీరోయిన్ కాగా ఆమె కంటే ఎక్కువగా హీరో కూతురిగా నటించిన చైల్డ్ ఆర్టిస్టునే హైలైట్ చేస్తున్నారు.

విశ్వనాథ్ అండ్ సన్స్ రెండోవారంలో అడుగు పెట్టేనాటికి నెమ్మదించే అవకాశాలు ఎక్కువగా ఉన్నాయి. క్లాస్ జనాలు బాగానే చూస్తున్నారు కానీ రెగ్యులర్ పబ్లిక్ పూర్తి స్థాయిలో టర్న్ కావడం లేదు. మాస్ ఎలిమెంట్స్ లేకపోవడమే కారణం. థియేటర్ మూమెంట్స్ డిమాండ్ చేసే కమర్షియల్ అంశాలకు వెంకీ అట్లూరి అంతగా ప్రాధాన్యం ఇవ్వలేదు. ఇరుముడి సరిగ్గా వీటినే టార్గెట్ చేసింది. ట్రైలర్లో చూపించిన వార్నింగులు, ఫైట్లు అందులో భాగంగా పెట్టినవే.

ఇరుముడికున్న ఒకే ఒక్క గండం ఆగస్ట్ 26 వచ్చే టాక్సిక్. యష్ హీరోగా రూపొందిన ఈ ప్యాన్ ఇండియా మూవీ ఏపీ తెలంగాణలోనూ పెద్ద రిలీజ్ దక్కించుకోనుంది. దాన్ని తట్టుకోవాలంటే ఇరుముడి అన్ని వర్గాల నుంచి యునానిమస్ టాక్ తెచ్చుకోవాలి. ఎలాగూ టాక్సిక్ కేవలం గ్రోన్ ఆప్స్ కోసమే తీసిందని హీరో చెబుతున్నాడు కాబట్టి పిల్లలు, కుటుంబాలు దానికి దూరంగా ఉంటారు. ఈ అవకాశాన్ని ఇరుముడి సరిగ్గా వాడుకుంటే చాలు బ్రేక్ ఈవెన్ కాదు హ్యాపీగా మంచి లాభాలతో బయట పడొచ్చు.