వారణాసి కానుకలు… తప్పని షరతులు

ఇంకో నాలుగు రోజుల్లో సూపర్ స్టార్ మహేష్ బాబు పుట్టినరోజు రానుంది. గుంటూరు కారం తర్వాత తన దర్శనం స్క్రీన్ మీద జరగకుండా పోయి రెండు సంవత్సరాలు దాటేసింది. రాజమౌళి కోసం ఇలాంటి త్యాగాలు గతంలో ప్రభాస్, రామ్ చరణ్, జూనియర్ ఎన్టీఆర్ లాంటి హీరోలు చేశారు కాబట్టి ఇప్పుడు మహేష్ కీ తప్పడం లేదు. సరే ప్యాన్ వరల్డ్ మూవీకి ఇవి సహజం కాబట్టి పోన్లేని సర్దుకుని ఫ్యాన్స్ 2027 ఏప్రిల్ 7 కోసం ఎదురు చూస్తున్నారు. ఈ టైంలో బర్త్ డే రావడం ఖచ్చితంగా మంచి అకేషన్.

సో వారణాసి నుంచి టీజర్ లాంటిది రిలీజ్ అవుతుందని ఫ్యాన్స్ వెయిట్ చేస్తున్నారు. కానీ అలాంటిదేమి ఉండకపోవచ్చట. రెండు కొత్త పోస్టర్లతో శుభాకాంక్షలు చెప్పడం తప్ప ప్రత్యేకంగా ఎలాంటి వీడియో కంటెంట్ రాదని విశ్వసనీయ సమాచారం. ఎందుకంటే జక్కన్న పెర్ఫెక్షన్ కోసం తపించే మనిషి. తాను కోరుకున్న క్వాలిటీ వచ్చే వరకు చిన్న స్టిల్ కూడా బయటికి వదలరు. అలాంటిది ఏకంగా టీజర్ అంటే ఆషామాషీ కాదు. అందుకే రావడం లేదని టాక్.

గతంలో చరణ్, తారక్ బర్త్ డేలకు విడివిడిగా ఆర్ఆర్ఆర్ టీజర్లు విడుదల చేసిన సందర్భాన్ని మహేష్ ఫ్యాన్స్ గుర్తు చేస్తున్నారు. అయితే వారణాసి పోస్ట్ ప్రొడక్షన్ పనులు పీక్స్ లో ఉన్నాయి. ఇలాంటి టైంలో ప్రత్యేకంగా టీజర్ కట్ చేసే సమయం రాజమౌళి బృందానికి లేదు. పైగా డోంట్ ట్రబుల్ ది ట్రబుల్ పనుల్లో కార్తికేయ కూడా బిజీగా ఉన్నాడట. కాబట్టి మహేష్ పుట్టినరోజని ఏదోకటి హడావిడిగా చేయడం ఇష్టం లేకే పోస్టర్స్ సిద్ధంగా చేశారని అంటున్నారు.

వచ్చే సంవత్సరం ఇంకో పుట్టినరోజు వచ్చేలోపల వారాణసి థియేటర్ రన్ అయిపోయి అప్పటికి ఓటిటిలో వచ్చేసి ఉంటుంది. కాబట్టి ఈ ఏడాదే ఏదైనా స్పెషల్ సర్ప్రైజ్ ఇచ్చి ఉండాల్సిందని మూవీ లవర్స్ కోరుకున్నారు. కానీ పరిస్థితులు అనుకూలంగా లేనప్పుడు ఎవరు మాత్రం ఏం చేస్తారు. ముందు అనుకున్న పోకిరి రీ రిలీజ్ కాకుండా ఈసారి దూకుడుతో సెలబ్రేషన్స్ జరగనున్నాయి. గత ఏడాది అతడు ఆశించిన పెద్ద స్థాయిలో ఆడలేదు. మరి దూకుడు ఏమైనా రికార్డులు చేస్తుందేమో చూడాలి.