మూడో పొలిమేర… ఇంకా పెద్దగా?

కమెడియన్ పాత్రలు చేసుకునే సత్యం రాజేష్‌ను హీరోగా పెట్టి చాలా తక్కువ బడ్జెట్లో ‘మా ఊరి పొలిమేర’ అనే సినిమా తీశాడు అనిల్ విశ్వనాథ్. అది ఓటీటీలో నేరుగా రిలీజై అనూహ్య స్పందన తెచ్చుకుంది. రాను రాను వ్యూస్ పెరిగి డిజిటల్‌గా బ్లాక్ బస్టర్ స్థాయిని అందుకుంది. 

దీంతో ఈ చిత్రానికి కొనసాగింపుగా కొంచెం ఎక్కువ బడ్జెట్ పెట్టి ‘పొలిమేర-2’ తీశారు మేకర్స్. అది థియేటర్లలో బాగా ఆడి మంచి లాభాలు తెచ్చిపెట్టింది. ఇప్పుడు ఈ ఫ్రాంఛైజీలో మూడో సినిమాకు రంగం సిద్ధమవుతోంది. ఈసారి సినిమా ఇంకా పెద్ద రేంజిలో తీయడానికి సన్నాహాలు జరుగుతున్నాయి. సత్యం రాజేష్ ఎప్పట్లాగే లీడ్ రోల్‌లో కొనసాగనుండగా.. ఇతర ముఖ్య పాత్రలూ కొనసాగబోతున్నాయి. ఈ చిత్రానికి ఇప్పుడు ఇంకో స్పెషల్ అట్రాక్షన్ తోడైంది.

సీనియర్ నటుడు, యాక్షన్ సినిమాలకు పెట్టింది పేరైన అర్జున్ సర్జా ‘పొలిమేర-3’లో కీలక పాత్ర పోషించనున్నాడట. రెండు నెలల ముందైతే అర్జున్ ఈ చిత్రంలో నటిస్తున్నాడంటే ప్రేక్షకులు పెద్దగా ఎగ్జైట్ అయ్యేవాళ్లు కాదు. కానీ ‘బ్లాస్ట్’ సినిమాతో సూపర్ హిట్ కొట్టి మంచి క్రేజ్ సంపాదించుకున్నాడు అర్జున్. ఇప్పుడాయనకు డిమాండ్ పెరిగింది. 

ఇలాంటి టైంలో ఆ నటుడిని ‘పొలిమేర-3’ కోసం లాక్ చేసి తమ సినిమాకు హైప్ పెంచుకునే ప్రయత్నం చేస్తోంది టీం. ‘పొలిమేర-2’ చివర్లో పార్ట్-3కి ఇచ్చిన లీడ్ చూస్తే ఈ సినిమా భారీగా ఉండబోతోందని అర్థమవుతోంది. ఇలా ఓటీటీలో రిలీజైన ఓ చిన్న సినిమా ఇప్పుడు ఇంత పెద్ద రేంజికి వెళ్లడం ఆశ్చర్యం కలిగించే విషయమే. మరి మూడో భాగంలో అనిల్ అండ్ టీం ఇంకెంత థ్రిల్ చేస్తుందో చూడాలి.