టికెట్ రేట్లు చేస్తున్న మేలు అర్థమవుతోందా

లెనిన్ సూపర్ హిట్టయిపోయింది. బ్లాక్ బస్టర్ దారిలో ఉంది. పదేళ్లకు పైగా విజయం కోసం మొహం వాచిపోయిన అఖిల్ అభిమానులకు విందు వడ్డించేసింది. ఇప్పుడు టాపిక్ ఇది కాదు. ఎలాంటి టికెట్ రేట్ల పెంపుకు వెళ్లకుండా రెగ్యులర్ ధరలతోనే ఈ ఫీట్ సాధించడం ఎగ్జిబిటర్లకు విపరీతమైన సంతోషాన్ని కలిగిస్తోంది. ఎందుకంటే చీటికిమాటికి ప్రతి సినిమాకు రేట్లు పెంచుకుంటూ పోవడాన్ని ఈ వర్గం ముందు నుంచి వ్యతిరేకిస్తోంది. లెనిన్ పాటించిన స్ట్రాటజీ మంచి ఫలితాన్ని ఇచ్చింది.

ఇదొక్కటే కాదు మా ఇంటి బంగారం అసలు టికెట్ రేట్ల ఆలోచనే అవసరం లేకుండా చక్కగా బిజినెస్ చేసుకుని వంద కోట్ల గ్రాస్ సాధించేసి టాలీవుడ్ మొదటి ఫిమేల్ ఓరియెంటెడ్ మూవీగా రికార్డు అందుకుంది. అరుంధతి, మహానటిని దాటేసి నెంబర్ వన్ స్థానాన్ని తీసుకుంది. కుటుంబాలు వారంతో సంబంధం లేకుండా గంపగుత్తగా ఈ సినిమాకు వచ్చాయంటే టికెట్ రేట్లు అందుబాటులో ఉండటమే. ఏపీలో ఒక అయిదుగురు సింగల్ స్క్రీన్ కు వెళ్తే అయ్యే ఖర్చు 500 రూపాయల లోపే.

తెలంగాణలోనూ మరీ తీవ్రంగా లేవు. మల్టీప్లెక్సులు కాస్త హైప్ ఉన్న సినిమాలకు 295 రూపాయలు పెట్టడం మాములే. ఎప్పుడైతే జిఓలు, పర్మిషన్లు అంటూ తెరమీదకు వస్తాయో అక్కడ టెన్షన్ స్టార్ట్ అవుతుంది. పెద్దికి మూడు వందల కోట్లు వచ్చి ఉండొచ్చు. కానీ పది రోజుల పాటు పెంపు తీసుకోవడం చాలా ప్రేక్షకులను దూరం చేసిందన్నది వాస్తవం. మన శంకరవరప్రసాద్ గారు లాంటివి కూడా ఈ సమస్య వల్ల ప్రభావితం చెందాయి. ఇవన్నీ ఒప్పుకోవాల్సిన వాస్తవాలే.

అసలే నాలుగు వారాల ఓటిటి విండోతో థియేటర్ల మనుగడ ప్రశ్నార్థకంగా మారింది. అయినా సరే జనం ఇంత వ్యయ ప్రయాసలు పడి సినిమాలకు వస్తున్నారంటే దానికి కారణం అందుబాటు ధరలే. ఉల్లిపాయల రేట్ పెరిగితే కొన్ని రోజులు వాటిని వాడటం తగ్గించే మధ్యతరగతి కుటుంబాలు అత్యధికంగా ఉండే రాష్టాలు మనవి. వాళ్లకున్న ప్రధానమైన వినోదం సినిమానే. దాన్ని దూరం చేసే ప్రయత్నం ఎప్పటికీ చేయకూడదు. ఫుట్ ఫాల్స్ ఇంకా పెరగాలంటే లెనిన్, మా ఇంటి బంగారం చూపించిన దారిలో వెళ్తే సరి.