NBK 111… ఎప్పుడు వస్తే బాగుంటుంది

నందమూరి బాలకృష్ణ, దర్శకుడు గోపిచంద్ మలినేని కలయికలో తెరకెక్కుతున్న భారీ యాక్షన్ మూవీ NBK 111 షూటింగ్ నిర్విరామంగా జరుగుతోంది. మొదట దసరా రిలీజ్ అనుకున్నారు కానీ ప్రాక్టికల్ గా సాధ్యమయ్యే అవకాశాలు తక్కువగా ఉన్నాయి. అందులోనూ పండగను టార్గెట్ చేసుకుని జైలర్ 2 వస్తోంది. దాని పోటీకి భయపడినా పడకపోయినా వృద్ధి బ్యానర్ సోలో రిలీజ్ వైపు చూస్తోంది. అందుకే డిసెంబర్ మొదటి ప్రాధాన్యతగా పెట్టుకున్నట్టు సమాచారం.

అభిమానులు సాధారణంగా బాలయ్య సినిమాని సంక్రాంతికి ఆశిస్తారు. అయితే ఈసారి కాంపిటీషన్ చాలా టఫ్ గా ఉండబోతోంది. చిరు బాబీ మూవీ, రవితేజ శ్రీవిష్ణు సినిమా, శర్వానంద్ కొత్త చిత్రం, వెంకటేష్ అనిల్ రావిపూడి కాంబో ఇలా పండగ బరిలో చాలా రష్ ఉంది. ఎవరిది ఎలా ఉన్నా బాలకృష్ణకు తనకంటూ స్పేస్ ఉంటుంది కానీ ఓపెనింగ్స్, కలెక్షన్లను ఇతర హీరోలతో పంచుకోవాల్సి ఉంటుంది. ఇదంతా ఎందుకనుకుంటే డిసెంబర్ కన్నా బెస్ట్ ఆప్షన్ ఉండదు.

గతంలో అఖండ ఇదే నెలలో వచ్చి రికార్డులు బద్దలు కొట్టింది. అఖండ 2 కూడా వచ్చింది కానీ ఆశించిన ఫలితం దక్కపోవడం వేరే విషయం. ఎంతసేపూ సంక్రాంతి కోసమే చూడకుండా రెవిన్యూ భారీగా వచ్చేలా ఉన్న ఇతర డేట్లను పరిశీలించే పనిలో టీమ్ ఉన్నట్టు సమాచారం. ప్రభాస్ ఫౌజీ రాక గురించి వార్తలు తిరుగుతున్న నేపథ్యంలో ఒకవేళ ఆ ప్యాన్ ఇండియా మూవీ కనక వచ్చే పనైతే ఎన్బికె 111 ఏం చేయాలనే దాని మీద కూడా సమాలోచనలు జరుగుతున్నాయి.

ఇవి మరికొన్ని రోజుల్లో కొలిక్కి రావొచ్చు. ముంబై బ్యాక్ డ్రాప్ లో మాఫియా డాన్ గా బాలయ్య ఇందులో కనిపిస్తారని వినికిడి. అయితే రెగ్యులర్ గా చూసిన తరహాలో కాకుండా సరికొత్త క్యారెక్టరైజేషన్ ఉంటుందట. డ్యూయల్ రోల్ కాదు కానీ బాలకృష్ణ పాత్రకు పెట్టిన షేడ్స్ ఫ్యాన్స్ తో పాటు మూవీ లవర్స్ ని ఊపేయడం ఖాయమని అంతర్గతంగా వినిపిస్తోంది. టైటిల్ లాంచ్ త్వరలోనే చేయబోతున్నారు. సినిమాలో హీరో పేరునే దాదాపు ఫిక్స్ చేశారట. అదేంటనేది ఇంకా లీక్ కాలేదు.