తెలుగోళ్లు గిచ్చితే కానీ… తమిళ సినిమా మారలేదు

ఒకప్పుడు సౌత్ ఇండియాలో నంబర్ వన్ ఫిలిం ఇండస్ట్రీగా ఉండేది కోలీవుడ్. తమిళ సినిమాల్లో కంటెంట్ అంత బలంగా ఉండేది. వసూళ్లు కూడా అలాగే వచ్చేవి. తమిళ చిత్రాలు ఇతర భాషల్లోనూ మంచి ఫలితాన్నందుకునేవి. తమిళ అనువాదాలను చూసి తెలుగు నిర్మాతలు భయపడే పరిస్థితి ఉండేది. కానీ పరిస్థితులు ఎప్పుడూ ఒకేలా ఉండవు కదా? 

తమిళ సినిమాల్లో క్వాలిటీ పడిపోవడం.. వాళ్ల సినిమాల పరిధి అంతకంతకూ కుచించుకోవడం.. అదే సమయంలో తెలుగుతో పాటు మిగతా భాషా చిత్రాల రేంజ్ పెరిగిపోవడంతో తమిళ సినీ జనాల అసహనం మామూలుగా లేదు. ఇండియన్ ఫిలిం ఇండస్ట్రీలో గత పదేళ్లలో వచ్చిన అతి పెద్ద మార్పును తమిళ ఫిలిం మేకర్స్ ఏమాత్రం అందిపుచ్చుకోలేక వెనుకబడిపోయారు. బాహుబలి లాంటి భారీ చిత్రాలను.. కాంతార తరహాలో సంస్కృతితో ముడిపడ్డ సినిమాలను రూపొందించలేక.. పాన్ ఇండియా స్థాయిలో తమిళ సినిమా మెరుపులు మెరిపించలేకపోయింది.

కుల వివక్ష మీద గొప్ప గొప్ప సినిమాలు తీసిన ఘనత కోలీవుడ్ సొంతం కానీ.. ఒక దశ దాటాక ఈ సినిమాలు జనాలకు కూడా మొహం మొత్తేసిన పరిస్థితి. వెట్రిమారన్, పా.రంజిత్, మారి సెల్వరాజ్ సహా చాలామంది దర్శకులది ఇదే వరస. ఆ తరహా సినిమాలు ఇప్పుడు వేరే భాషల్లో అస్సలు వర్కవుట్ కావడం లేదు. తమిళంలో కూడా వాటి పరిధి తగ్గిపోయింది. ఇలాంటి టైంలో ధనుష్, వెట్రిమారన్ కలయికలో ‘తమిళ్ మురుగన్’ అనే సినిమాను అనౌన్స్ చేయడం అందరికీ ఆశ్చర్యం కలిగించింది. ఇటు ధనుష్, అటు వెట్రిమారన్ ఎప్పుడూ అప్రెషన్ సినిమాలు తీస్తుంటారని సోషల్ మీడియాలో కామెంట్లు వినిపిస్తుంటాయి. 

ఇలాంటి కలయికలో పురాణ గాథ రావడం అన్నది ఊహకందని విషయం. ఇది కోలీవుడ్లో వచ్చిన అనూహ్య మార్పుకి సంకేతంగా భావించవచ్చు. డివైన్ ఎలిమెంట్స్ మీద, పురాణాల మీద సరిగ్గా సినిమాలు తీస్తే పాన్ ఇండియా స్థాయిలో సక్సెస్ అయ్యే అవకాశముంటుంది. కానీ ఈ తరహా సినిమాలు తీయడంలో తమిళ ఫిలిం మేకర్స్ బాగా వీక్. స్టార్ హీరోలు, పెద్ద దర్శకులు పూర్తిగా ఆ సినిమాలకు దూరం అయిపోయారు. ఐతే ఇటీవల ‘కరుప్పు’ సినిమా బ్లాక్ బస్టర్ కావడం.. 

అదే సమయంలో తమిళులు తమ దైవంగా భావించే సుబ్రహ్మణ్యస్వామి మీద తెలుగులో ‘గాడ్ ఆఫ్ వార్’ ప్రాజెక్టును ప్రకటించడం.. పైగా ఆ సినిమా అనౌన్స్‌మెంట్ సందర్భంగా మురుగన్ ఉత్తరాదిన పుట్టినట్లు నాగవంశీ పేర్కొనడం తమిళులకు కోపం తెప్పించడం.. ఈ పరిణామాలన్నీ దృష్టిలో ఉంచుకుని ధనుష్, వెట్రిమారన్ కలయికలో ‘తమిళ్ మురుగన్’ సినిమాను ప్రకటించినట్లున్నారు.

ఇదేదో ‘గాడ్ ఆఫ్ వార్’కు పోటీగా.. మురుగుడు తమిళనాడులోనే పుట్టాడని ప్రపంచానికి చాటడానికి తీస్తున్న సినిమాలా కనిపిస్తోంది. అయినా సరే.. ఒక అగ్ర కథానాయకుడు, టాప్ డైరెక్టర్‌ కలిసి ఇప్పటికైనా హిందూ పురాణాలు, సంస్కృతితో ముడిపడ్డ సినిమా తీయాలన్న ఆలోచన రావడం మంచిదే అని..తెలుగు వాళ్లు గిచ్చితే కానీ వాళ్లలో కదలిక రాలేదనే చర్చ జరుగుతోంది.