సుకుమార్ వేసిన దారిలో ఎందరో

ఎనిమిది సంవత్సరాల క్రితం రంగస్థలం విడుదలకు ముందు ఇది ఎలా ఉంటుందనే అనుమానాలు ఫ్యాన్స్ లోనే ఉండేవి. కారణం టిపికల్ గా అనిపించే దర్శకుడు సుకుమార్ శైలి. 1980 సెటప్ తీసుకుని పక్కా పల్లెటూరి నేపథ్యంలో ఎలాంటి సెల్ ఫోన్లు, ఇంటర్ నెట్ లేని రోజుల్లో చిట్టిబాబు కథని చూపించిన తీరుకి ఇండస్ట్రీ రికార్డులు బద్దలయ్యాయి. ఇప్పటికీ రామ్ చరణ్ కెరీర్ బెస్ట్ లో అగ్ర స్థానం ఈ సినిమాదే. పెద్ది నటన పరంగా పైన ఉండొచ్చు కానీ సినిమాగా అయితే కాదు.

అక్కడితో మొదలు రంగస్థలం తరహాలో గ్రామీణ నేపధ్యాన్ని తీసుకుని, 90స్ కాలాన్ని వాడుకుని ఎన్ని సినిమాలతో ఎందరు దర్శకులు హిట్లు కొట్టారో లెక్క లేదు. శ్రీకాంత్ ఓదెల దసరా, సుకుమారే తీసిన పుష్ప, త్వరలో రాబోయే ప్యారడైజ్ తో పాటు హరోంహర, భైరవం లాంటి ఎన్నో సినిమాలు ఇదే దారి పట్టాయి. వీటిలో ఫ్లాప్ అయినవి లేకపోలేదు. కానీ పీరియాడిక్ విలేజ్ సెటప్ లో ఉన్న కమర్షియల్ వేల్యూస్ అర్థం చేసుకున్న నిర్మాతలు ఇలాంటి కథలకే ప్రాధాన్యం ఇస్తూ వచ్చారు.

తాజాగా వచ్చిన లెనిన్ కూడా 1986 టైంలో మొదలయ్యే స్టోరీ. అచ్చం రంగస్థలం లాగే ఎలాంటి జెన్ జీ రెఫరెన్సులు ఉండవు. రివెంజ్ పాయింట్ తీసుకుని దాని చుట్టూ పల్లెటూరి మనుషుల క్యారెక్టర్లు రాసుకుని ఒక ఇంటెన్స్ డ్రామా ఇచ్చారు. ప్లస్సులు మైనస్సులు బోలెడు ఉన్నాయి కానీ జనాలకు కనెక్ట్ అయ్యే విధంగా చేయడంలో వసూళ్లు బాగున్నాయి. దశాబ్దం పైగా అఖిల్ కు ప్రేమకథల్లో రాని విజయం ఇప్పుడీ విలేజ్ మూవీ ద్వారా వచ్చేలా ఉంది.

ఒకరకంగా చెప్పాలంటే సుకుమార్ కనిపెట్టిన ఫార్ములా ట్రెండ్ సెట్టర్ గా మారుతోంది. ఇన్నేళ్ల తర్వాత కూడా ఇది కొనసాగుతూ మంచి ఫలితాలు ఇస్తుండటం గొప్ప విషయం. ఎప్పుడు ఆగుతుందో బ్రేక్ ఇస్తుందో చెప్పలేం కానీ ఇప్పుడప్పుడే స్టాప్ అయ్యే సూచనలు లేవు. మరికొన్ని నిర్మాణంలో ఉన్నవి కూడా ఇదే జానర్ లో రూపొందుతున్నాయి. రంగస్థలంకి సీక్వెల్ రాలేదు కానీ దాని కోవలో వచ్చినవి మాత్రం డబ్బులు బాగా చేసుకుంటున్నాయి. ఇది ఇప్ప్పట్లో ఆగేది కాదు.