కళ్యాణ్ రామ్ చేతిలో సూపర్ థ్రిల్లర్

నందమూరి కళ్యాణ్ రామ్ కొత్త సినిమాను ఖరారు చేయడానికి చాలా సమయమే తీసుకుంటున్నాడు. గత ఏడాది సంక్రాంతికి ‘ఎంత మంచి వాడవురా’తో పలకరించిన అతను.. ఆ తర్వాత ఇప్పటిదాకా కొత్త సినిమాను ప్రకటించలేదు. ‘118’తో ఫామ్‌లోకి వచ్చిన నందమూరి హీరోకు ‘ఎంత మంచివాడవురా’ మంచి విజయాన్నందిస్తుందనుకుంటే.. కెరీర్లోనే అతి పెద్ద డిజాస్టర్లలో ఒకటిగా నిలిచింది. దీంతో తర్వాత ఎలాంటి సినిమా ఎంచుకోవాలనే విషయంలో అతను అయోమయంలో పడ్డాడు.

మారుతి ఓ కథ చెప్పగా.. దాన్ని కళ్యాణ్ రామ్ తిరస్కరించినట్లు వార్తలొచ్చాయి. పవన్ సాధినేని దర్శకత్వంలో అనుకున్న సినిమా కూడా పక్కకు వెళ్లిపోయింది. ఇంకేవో కొన్ని ప్రతిపాదనలు వచ్చాయి కానీ.. ఏవీ కార్యరూపం దాల్చలేదు. ఐతే ఇప్పుడు కళ్యాణ్ రామ్ ఓ మలయాళ సూపర్ హిట్ మూవీ రీమేక్‌లో నటించడానికి సిద్ధమవుతున్నట్లు వార్తలొస్తున్నాయి.

గత ఏడాది మలయాళంలో పెద్ద విజయం సాధించిన చిత్రాల్లో ‘అంజామ్ పత్తిర’ ఒకటి. కుంచుకోబోబన్ హీరోగా నటించిన ఈ సినిమా.. ఇండియాలో వచ్చిన బెస్ట్ థ్రిల్లర్లలో ఒకటిగా పేరు తెచ్చుకుంది. పోలీస్ డిపార్ట్‌మెంట్లో ఒకరి తర్వాత ఒకరు అదృశ్యం కావడం.. తర్వాత వాళ్లు దారుణంగా హత్యకు గురి కావడం.. అందులో ఒక ప్యాటెర్న్ కనిపించడం.. పోలీస్ డిపార్ట్‌మెంట్‌కు పెద్ద సవాలుగా మారిన ఈ కేసును ఛేదించడానికి మానసిక వైద్య నిపుణుడైన హీరో రంగంలోకి దిగడం.. ఈ నేపథ్యంలో ‘అంజామ్ పత్తిర’ నడుస్తుంది. ఆద్యంతం ఉత్కంఠ రేకెత్తిస్తూ.. థ్రిల్‌కు గురి చేస్తూ సాగే ‘అంజామ్ పత్తిర’ థ్రిల్లర్ ప్రియుల్ని విపరీతంగా ఆకట్టుకుంది. ఇంతకుముందు కళ్యాణ్ రామ్‌లో ‘118’ అనే థ్రిల్లర్ తీసిన గుహన్ ఈ రీమేక్‌కు దర్శకత్వం వహిస్తాడని అంటున్నారు. ఇద్దరూ తెలుగు రీమేక్ స్క్రిప్టు మీద చర్చలు జరుపుతున్నారట. త్వరలోనే ఈ ప్రాజెక్టు పట్టాలెక్కుతుందని అంటున్నారు.