సత్యదేవ్ ఆశలన్నీ బహదూర్ మీదే

ఇంకో పది రోజుల్లో రావు బహదూర్ విడుదల కానుంది. సత్యదేవ్ ఎప్పుడూ లేనంత వైవిధ్యంగా వివిధ గెటప్స్ లో ఇందులో దర్శనమివ్వబోతున్నాడు. మహేష్ బాబు నిర్మాణం కావడంతో కంటెంట్ చాలా బలంగా ఉంటుందనే నమ్మకం మూవీ లవర్స్ లో ఉంది. దర్శకుడు వెంకటేష్ మహా కేరాఫ్ కంచరపాలెం తర్వాత మళ్ళీ ఆ స్థాయి ఇంపాక్ట్ తన సినిమాలతో చూపించలేదు. ఇప్పుడు ఇంత పెద్ద బడ్జెట్ తో బంగారం లాంటి అవకాశం కోరి మరీ తలుపు తట్టింది.

సత్యదేవ్ కి ఇది హిట్ కావడం చాలా అవసరం. ఎందుకంటే ఇండస్ట్రీకి వచ్చి ఇన్ని సంవత్సరాలు అవుతున్నా ఇంకా స్టార్ ముద్ర పడలేదు. ఆర్టిస్టుగా మంచి పేరు ఉంది. ఆడియన్స్ లో కావాల్సినంత గౌరవం ఉంది. అయినా ఇవి సరిపోవడం లేదు. చిరంజీవి కోసం గాడ్ ఫాదర్ లో విలన్ గా నటించేందుకు సిద్ధపడినా ప్రయోజనం దక్కలేదు. బ్లఫ్ మాస్టర్ లాంటి వర్త్ ఉన్న సినిమాలు ఆడకపోవడం సత్యదేవ్ కెరీర్ ని నెమ్మదించేలా చేయడం ఒప్పుకోవాల్సిన నిజం.

జూలై 3 మంచి టైం చూసుకుని రావు బహదూర్ దిగుతున్నాడు. పోటీగా నాగబంధం ఉంది. దీన్ని తక్కువంచనా వేయడానికి లేదు. విజువల్ ఎఫెక్ట్స్ ని పెద్ద ఎత్తున ప్రమోట్ చేసుకుంటూ ఫ్యామిలీ ఆడియన్స్ ని టార్గెట్ చేసుకున్నారు. సత్యదేవ్ సినిమా కమర్షియల్ ఎక్స్ పరిమెంట్ లా కనిపిస్తోంది. కనెక్ట అయ్యిందా ఆడియన్స్ థ్రిల్ అయిపోయి వసూళ్లు కురిపిస్తారు. ఏ మాత్రం కన్ఫ్యూజన్ ఉన్నా అటు ఇటు అయ్యే రిస్క్ లేకపోలేదు.

ఈవెంట్లలో సత్యదేవ్, వెంకటేష్ మహా మాటలు కొంత అతిశయోక్తిగా అనిపించినా సినిమా మీద వాళ్ళ నమ్మకాన్ని బహిర్గతపరిచింది. ఒకరేమో ఆర్ఆర్ఆర్ తో రావు బహదూర్ ని పోలిస్తే మరొకరేమో సత్యదేవ్ ని ఏకంగా కమల్ హాసన్ తో పోల్చేశారు. ఈ స్టేట్ మెంట్లు నిజమని ఋజువు కావాలి. అంటే ఎక్స్ ట్రాడినరిగా మూవీ ఉందనే టాక్ బయటికి రావాలి. ఇకపై నాన్ స్టాప్ గా పబ్లిసిటీ చేసేందుకు టీం రెడీ అవుతోంది. ఇది సక్సెస్ అయితే సత్యదేవ్ సినిమాలు విడుదలకు క్యూ కట్టేస్తాయి.