బంగారం లాంటి ఓపెనింగ్స్ తీసుకొచ్చింది

పెద్ది మొదటి రెండు వారాలు బాగా సందడి చేసి కలెక్షన్ల వర్షం కురిపించాక మళ్ళీ దాన్ని కొనసాగించే సినిమా ఏది వస్తుందని ఎదురు చూసిన బయ్యర్ వర్గాలకు సమంత మూవీ కొంగు బంగారమే అయ్యింది. మొదటి వీకెండ్ ప్రపంచవ్యాప్తంగా సుమారు 45 కోట్ల దాకా గ్రాస్ వసూలు చేసినట్టు తెలిసి అభిమానుల ఆనందం అంతా ఇంతా కాదు. నిన్న దాదాపు అన్ని సెంటర్స్ లో టికెట్లు లేవు. ముఖ్యంగా మహిళలు, కుటుంబ ప్రేక్షకులు థియేటర్ల దగ్గర బారులు తీరారు.

ఓవర్సీస్ లో మిలియన్ మార్క్ దాటేసి స్ట్రాంగ్ గా ఉన్న మా ఇంటి బంగారం ఇక ఇవాళ్టి నుంచి ఎలా పెర్ఫార్మ్ చేస్తుందనేది ఆసక్తికరంగా మారింది. ట్రెండ్స్ గమనిస్తే విపరీతంగా డ్రాప్ అయ్యే సూచనలు తక్కువగా ఉన్నాయి. మొదటి మూడు రోజుల్లో మిస్ అయినవాళ్లు వీక్ డేస్ లో అయినా చూసే తీరాలని నిర్ణయించుకోవడం కలెక్షన్లకు బాగా ఉపయోగపడనుంది. మాస్ జనాలకు నచ్చే అంశాలు కూడా సరిపడా ఉండటంతో టాక్ పరంగా బంగారంకు ప్లస్ అవుతోంది.

ఈ జోరు ఎప్పటి వరకు ఉంటుందనే దాన్ని బట్టి వంద కోట్ల మార్కును అందుకుంటుందా లేదానేది ఆధారపడి ఉంటుంది. రిలీజ్ కు ముందు చేసిన ప్రమోషన్లు ఓపెనింగ్స్ కు చాలా ఉపయోగపడ్డాయి. ముఖ్యంగా ఒక సాంప్రదాయ తెలుగు కుటుంబంలోని కోడలిగా సామ్ ని ప్రోజెక్ట్ చేయడం ఎంత సానుకూలంగా మారిందో జనాల రియాక్షన్లు చూసి చెప్పొచ్చు. ఏదో మల్టీ మిలియనీర్ ఫ్యామిలీ కాకుండా ఒక పల్లెటూరిలో కథను నడిపించడం కనెక్టివిటీని పెంచింది.

పోటీలో ఉన్న ఇతర సినిమాలు మా ఇంటి బంగారంకి కనీస పోటీ ఇవ్వలేని స్థితిలో ఎదురీదుతున్నాయి. దీవానాను నగర యువత చూస్తోంది కానీ కింది స్థాయి కేంద్రాల్లో ఆడియన్స్ కి చేరడం లేదు.. పబ్లిసిటీ స్ట్రాటజీ మార్చాల్సిన అవసరం చాలా కనిపిస్తోంది. వంద దేవుళ్ళు, బాలన్ టాక్ కొంచెం బాగానే ఉన్నా టికెట్ కౌంటర్ల దగ్గర సందడి లేదు. ట్రాన్స్ ఫర్ త్రిమూర్తులు త్వరగా ట్రాన్స్ ఫర్ అయ్యేలా ఉన్నాడు. సో ఇంకో వీకెండ్ కూడా మా ఇంటి బంగారం కంట్రోల్ లోకి రావడం ఖాయమే.