అబ్సెషన్ మూవీకి నీలాంబరి కనెక్షన్

బాక్సాఫీస్ వద్ద అద్భుతాలు చేస్తున్న హాలీవుడ్ మూవీ అబ్సెషన్ ఇప్పుడప్పుడే ఆగేలా లేదు. రెండు గంటల లోపే నిడివితో థ్రిల్లర్ ప్రియులను కట్టిపడేస్తున్న ఈ సినిమా పెద్ది వల్ల ఏపీ తెలంగాణ బిసి సెంటర్స్ లో ఆలస్యంగా రిలీజయ్యింది. అయినా సరే హౌస్ ఫుల్ కలెక్షన్లతో దూసుకుపోతోంది. తెలుగు డబ్బింగ్ చేయకపోయినా, చాలా చోట్ల సబ్ టైటిల్స్ అందుబాటులో లేకపోయినా దీన్ని ఖచ్చితంగా చూడాలని ఫిక్సైన మూవీ లవర్స్ థియేటర్లకు వెళ్లిపోతున్నారు.

అంతా బాగానే ఉంది కానీ మరి నీలాంబరి కనెక్షన్ ఏంటో చూద్దాం. అబ్సెషన్ లో ఉన్న మెయిన్ పాయింట్ ఇష్టపడిన అబ్బాయి మీద విపరీతమైన ప్రేమ పెంచుకున్న ఒక అమ్మాయి దాని కోసం ఎంతకైనా తెగించడం చివరికి హత్యలు చేయడానికి కూడా వెనుకాడకపోవడం అబ్సెషన్ లో ఉన్న కథాంశం. 1999లో వచ్చిన రజనీకాంత్ నరసింహలో రమ్యకృష్ణ పోషించిన నీలాంబరి క్యారెక్టర్ ఇంచుమించు ఇదే ఛాయల్లో ఉంటుందని ఓసారి ఫ్లాష్ బ్యాక్ వెళ్తే లింక్ అవుతుంది.

నరసింహలో రజనీకాంత్ కు సౌందర్యతో పెళ్లి ఫిక్స్ అయ్యాక అది జరగకూడదని రమ్యకృష్ణ ఎద్దుని రెచ్చగొట్టి ఆ అమ్మాయిని చంపాలని చూస్తుంది. కానీ సౌత్ సినిమా కాబట్టి హీరో ఎంట్రీ ఇచ్చి ఏఆర్ రెహమాన్ బ్యాక్ గ్రౌండ్ స్కోర్ తో కాపాడేస్తాడు. ఆ తర్వాత నీలాంబరి పిచ్చదానిలా సంవత్సరాల తరబడి చీకటి గదిలో మగ్గిపోతుంది. దీనికి కొంచెం దగ్గరగా అంతకు ముందే రమ్యకృష్ణ ఈవీవీ సత్యనారాయణగారు తీసిన ఆయనకు ఇద్దరులో ఒక క్యారెక్టర్ చేశారు. అందులో జగపతిబాబు హీరో.

వినడానికి కొంచెం సిల్లీగా అనిపించినా అబ్సెషన్ లాంటి కాన్సెప్ట్స్ మనోళ్లు ఎప్పుడో టచ్ చేశారని చెప్పడానికి ఇదో చిన్న ఉదాహరణ మాత్రమే. ఓంకారంలో హీరోయిన్ ప్రేమ వెంట పడే రాజశేఖర్ లో కూడా ఇలాంటి పోలికలే గమనించవచ్చు. తరుణ్ ప్రియమైన నీకులో సెకండ్ హీరోయిన్ కు ఈ తరహా టచ్ ఉంటుంది. ఇలా చెప్పుకుంటూ పోతే బోలెడు ఉదాహరణలు కనిపిస్తాయి. మొత్తానికి ఫైనల్ రన్ అయ్యేలోపు అబ్సెషన్ ఇండియా వైడ్ వంద కోట్ల దాకా వసూలు చేయొచ్చని ట్రేడ్ అంచనా.