కోరుకున్న సినిమా వ‌చ్చింది… ఆద‌రిస్తారా?

తెలుగులో ప్ర‌యోగాత్మ‌క చిత్రాలు త‌క్కువ అని… కొత్త క‌థ‌లు ప్ర‌య‌త్నించ‌ర‌ని.. ఎప్పుడూ మాస్ మంత్ర‌మే ప‌ఠిస్తుంటార‌ని.. క‌థ‌ల‌న్నీ హీరోల చుట్టూనే తిరుగుతుంటాయ‌ని.. ఒక వ‌ర్గం ప్రేక్ష‌కులు ఫిర్యాదులు చేస్తుంటారు. మ‌ల‌యాళంలోనో, మ‌రో భాష‌లోనో వినూత్న‌మైన క‌థ‌ల‌తో సినిమాలు వ‌స్తే వాటిని కొనియాడుతూ మ‌న సినిమాల దుస్థితి గురించి ఆవేద‌న వ్య‌క్తం చేస్తుంటారు.

ఐతే ఇలా బాధ ప‌డే ప్రేక్ష‌కులు.. మ‌న ద‌గ్గ‌ర మంచి సినిమాలు వ‌చ్చిన‌పుడు కూడా ఆద‌రించి త‌మ అభిరుచిని చాటుకోవాల్సిన అవ‌స‌ర‌ముంది. అప్పుడే మ‌న ద‌గ్గర త‌ర‌చుగా కొత్త క‌థ‌లు వ‌స్తాయి. ప్ర‌యోగాలు జ‌రుగుతాయి.

ఇప్పుడీ చ‌ర్చ ఎందుకంటే.. తెలుగులో తాజాగా సింగ్ గీతం అనే వినూత్న‌మైన సినిమా వ‌చ్చింది. ఇది లెజెండరీ డైరెక్ట‌ర్ సింగీతం శ్రీనివాస‌రావు డైరెక్ట్ చేసిన మూవీ. 94 ఏళ్ల వ‌య‌సులో ఆయ‌నీ సినిమా తీయ‌డం విశేషం. తెలుగు సినిమాకు ఆయ‌న చేసిన సేవ‌ల‌కు కృత‌జ్ఞ‌త‌గా నాగ్ అశ్విన్, వైజయంతీ మూవీస్ టీం.. డ‌బ్బుల‌తో పాటు ఎంతో శ్ర‌మ‌ను కూడా వెచ్చించి ఈ సినిమాకు దృశ్య‌రూపాన్ని ఇచ్చింది. సింగీతం ఎప్పుడో 40 ఏళ్ల కింద‌ట అనుకున్న ఆలోచ‌న‌ను ఇప్పుడు డెవ‌ల‌ప్ చేసి, ఏమాత్రం రాజీ లేని ప్రొడ‌క్ష‌న్‌తో సినిమా తీసిన‌ నాగి అండ్ టీం కమిట్మెంట్ గురించి ఎంత చెప్పినా త‌క్కువే.

సింగీతం ఒక‌ప్పుడు గొప్ప సినిమాలు తీశారు కాబ‌ట్టి.. ఇప్పుడు కేవ‌లం ఆయ‌న మీద గౌర‌వంతో ఈ సినిమా చూడాల్సిన అవ‌స‌ర‌మేమీ లేదు. తాను ఇంకా యంగ్ ఫిలిం మేక‌ర్‌నే అని ఈ సినిమా కాన్సెప్ట్‌తోనే చాటిచెప్పారు సింగీతం.

ఒక శాపం వ‌ల్ల ఊరిలో జ‌నాల మాట‌లు పాట‌లుగా మారిపోయే వినూత్న‌మైన కాన్సెప్ట్‌కు తోడు.. ఇందులో గొప్ప సందేశం ఉంది. సందేశాన్ని వినోదాత్మ‌కంగా చెబుతూ.. ప్రేక్ష‌కుల‌కు స‌రికొత్త అనుభూతిని ఇచ్చారు సింగీతం అండ్ టీం. సింగ్‌గీతం సినిమాకు వెళ్లిన ఎవ్వ‌రైనా ఇలాంటి సినిమా ఇంత‌కుముందెన్న‌డూ చూడ‌లేద‌ని క‌చ్చితంగా చెబుతారు.

ప్ర‌తి స‌న్నివేశం.. ప్ర‌తి డైలాగ్‌ కొత్త‌గా ఉంటుంది. మాట‌లనే పాట‌లుగా మార్చి ఈ క‌థ‌ను న‌రేట్ చేసిన తీరు గ‌మ్మ‌త్తుగా అనిపిస్తుంది. మ‌ధ్య మ‌ధ్య‌లో కొంచెం బోర్ కొట్టినా.. మ‌రి కొన్ని ప్ర‌తికూల‌తలు ఉన్నా స‌రే.. కొత్త‌ద‌నం కోరుకునే ప్రేక్ష‌కులు ఈ సినిమా చూసి ఎంత‌మాత్రం రిగ్రెట్ కారు. మ‌రి మంచి టాక్, రివ్యూలు తెచ్చుకున్న సింగ్ గీతంను అభిరుచి ఉన్న ప్రేక్ష‌కులు ఎంత‌మేర ఆద‌రించి బాక్సాఫీస్ ద‌గ్గ‌ర దానికి ప‌ట్టం క‌డ‌తారో చూడాలి.