మొదటి కుస్తీలో ‘పెద్ది’కి వంద పాయింట్లు

తొలి రోజు పూర్తి చేసుకున్న పెద్ది మొత్తం ప్రీమియర్లతో కలిపి ప్రపంచవ్యాప్తంగా 135 కోట్ల గ్రాస్ దాటేసి బలమైన సెకండ్ డే కోసం రెడీ అవుతోంది. ఓవర్సీస్ లో 2.5 మిలియన్ మార్కు క్రాస్ చేసి అక్కడా తన ముద్ర వేసేందుకు పరుగులు పెడుతోంది. ఇది యూనిట్ అధికారికంగా ప్రకటించిన నెంబర్. ఒకవేళ క్షేత్ర స్థాయిలో కాస్త హెచ్చు తగ్గులు ఉండొచ్చేమో కాని ఓవరాల్ గా చూసుకుంటే రామ్ చరణ్ బెస్ట్ నెంబర్లు నమోదు కావడం పట్ల ఫ్యాన్స్ ఆనందంగా ఉన్నారు.

అసలు సవాల్ ఇకపై ఉంది. పెద్దికి మిక్స్డ్ టాక్ లేకపోలేదు. కొన్ని వర్గాలకు విపరీతంగా నచ్చేయగా నచ్చని వాళ్ళు కూడా ఉన్నారు. అందుకే పబ్లిక్ టాక్ యావరేజ్ నుంచి బ్లాక్ బస్టర్ మధ్యలో ఊగుతోంది. ఒకవేళ టాక్ లైట్ తీసుకుని జనం కనక పెద్దిని చూడాలని ఫిక్స్ అయితే ఆల్ టైం రికార్డు అంకెలు నమోదు కావడం ఖాయం. ఇటీవలే వీరభద్రుడు, దృశ్యం 3 లాంటి సోసో టాక్ తెచ్చుకున్న డబ్బింగ్ సినిమాలే తెలుగు రాష్ట్రాల్లో డీసెంట్ రెవిన్యూ సాధించుకున్నాయి.

అలాంటిది పెద్దికి భారీ వసూళ్లు రావడంలో ఆశ్చర్యం లేదు. ముఖ్యంగా ఆరు వందల రూపాయలు ప్రీమియర్ షో టికెట్ రేట్ పెట్టినా ఫ్యాన్స్ మాత్రమే కాకుండా రెగ్యులర్ ఆడియన్స్, కుటుంబాలు వాటికి రావడం గమనార్హం. ఈ రోజు హోల్డ్ బలంగా కనిపిస్తోంది. ముఖ్యంగా బిసి సెంటర్స్ లో కరెంట్ బుకింగ్స్ బాగున్నాయని, అయితే పది రోజుల పెంపుకు ప్రభుత్వాలు అనుమతి ఇవ్వడం వల్ల సోమవారం నుంచి ఎంత డ్రాప్ ఉంటుందనేది అంతు చిక్కడం లేదు.

పెద్దికి ప్రధానాంగా కలిసి వస్తున్న పాయింట్ లాంగ్ వీకెండ్. బుధవారమే ప్రీమియర్లు వేయడంతో ఆదివారం వచ్చేనాటికి నాలుగో రోజు అవుతుంది. ఆక్యుపెన్సీలు పెద్ద ఎత్తున ఉంటాయి. సో ఈ అవకాశాన్ని పెద్ది కనక క్యాష్ చేసుకుంటే ఈజీగా బ్రేక్ ఈవెన్ టార్గెట్ చేసుకోవచ్చు. అయితే అదంత సులభం కాదు. టాక్ మరింత పెరగాలి. మిక్స్డ్ నుంచి యునానిమస్ గా మారాలి. పెద్ది బృందం ఆ నమ్మకంతోనే ఉంది. సక్సెస్ మీట్ చేసే ప్రతిపాదన ప్రస్తుతం పరిశీలనలో ఉంది.