పుష్ప‌తో ఎలా ఫేట్ మారిందో చెప్పిన‌ సునీల్

సునీల్ అంటే కామెడీ.. కామెడీ అంటే సునీల్ అన్న‌ట్లుగా ఉండేది ఒక‌ప్పుడు తెలుగు సినిమాల్లో. కానీ త‌ర్వాత అత‌ను హీరోగా మారాడు. క్ర‌మంగా కామెడీ వేషాలు మానేశాడు. మొద‌ట్లో హీరోగా కొన్ని మంచి విజ‌యాలు అందుకున్నాడు కానీ.. త‌ర్వాత క‌థ అడ్డం తిరిగింది. హీరోగా వ‌రుస వైఫ‌ల్యాలు ఎదుర్కోవ‌డంతో మ‌ళ్లీ కామెడీ వేషాల వైపు మ‌ళ్లాల్సి వ‌చ్చింది. కానీ ఒక‌ప్ప‌ట్లా త‌న కామెడీ వ‌ర్క‌వుట్ కాలేదు. అలాంటి ద‌శ‌లో అనూహ్యంగా విల‌న్ వేషాల వైపు మ‌ళ్లాడు.

క‌ల‌ర్ ఫొటోలో విల‌న్ పాత్ర‌తో మెప్పించాక పుష్ప సినిమాతో సునీల్ ఫేట్ మారిపోయింది. అత‌ను బ‌హు భాషా న‌టుడిగా ఎదిగిపోయాడు. త‌మిళంలో ఇప్ప‌టికే సూప‌ర్ స్టార్ ర‌జినీకాంత్ మూవీ జైల‌ర్ స‌హా అర‌డ‌జ‌నుకు పైగా సినిమాల్లో న‌టించాడు సునీల్. క‌న్న‌డ‌లోనూ కిచ్చా సుదీప్ సినిమా మ్యాక్స్‌లో న‌టించాడు. తాజాగా మ‌ల‌యాళంలోనూ అడుగు పెట్టేశాడు.

ఈ మధ్య ఒక ఈవెంట్ లో పాల్గొన్న సునీల్ పుష్ప సినిమా త‌న జీవితాన్ని ఎలా మార్చేసిందో వివ‌రించాడు. ఆ సినిమాలో మంగ‌ళం శీను పాత్ర‌తో త‌న‌కు దేశ‌వ్యాప్తంగా ఎన‌లేని గుర్తింపు ల‌భించి, త‌న జీవితం మారిపోయింద‌ని సునీల్ తెలిపాడు. ఎప్పుడు ఏ భాష నుంచి ఎవ‌రు ఫోన్ చేసి సినిమా అవ‌కాశం ఇస్తారో తెలియ‌ని విధంగా అయిపోయింద‌ని సునీల్ న‌వ్వుతూ వ్యాఖ్యానించాడు.

త‌మిళంలో చాలా సినిమాల్లో న‌టించాక మ‌ల‌యాళంలోనూ అవ‌కాశం వ‌చ్చింద‌ని.. అక్క‌డ తాను త‌మిళుడిని అనుకుని సీన్ పేప‌ర్ ఆ భాష‌లోనే ఇచ్చార‌ని సునీల్ గుర్తు చేసుకున్నాడు. ఇన్ని భాష‌ల్లో త‌న‌ను ఆద‌రిస్తుండ‌డం ప‌ట్ల సునీల్ ఆనందం వ్య‌క్తం చేశాడు. వ‌చ్చే నెల‌లో విడుద‌ల కాబోయే త‌మిళ‌నాడు ముఖ్య‌మంత్రి విజ‌య్ మూవీ జ‌న‌నాయ‌గ‌న్‌లోనూ సునీల్ ఓ కీల‌క పాత్ర పోషించ‌డం విశేషం.