బన్నీ బర్త్ డే ట్రీట్… కేవలం టైటిలేనా?

ఐకాన్ స్టార్ అల్లు అర్జున్ పుట్టినరోజు అనగానే సోషల్ మీడియాలో హడావిడి మామూలుగా ఉండదు. ఏప్రిల్ 8వ తేదీ దగ్గర పడుతుండటంతో, అట్లీ దర్శకత్వంలో రాబోతున్న భారీ ప్రాజెక్ట్ AA22 గురించి రకరకాల వార్తలు వినిపిస్తున్నాయి. ముఖ్యంగా ఈ పుట్టినరోజు కానుకగా సినిమా టైటిల్‌ను ఎనౌన్స్ చేస్తారని గట్టిగా ప్రచారం జరుగుతోంది. అయితే ఇక్కడే ఒక చిన్న ట్విస్ట్ ఉంది. కేవలం పేరు మాత్రమే ప్రకటిస్తారా లేక ఏదైనా టీజర్ లాంటి వీడియో కంటెంట్ ఉంటుందా అనే విషయంలో క్లారిటీ రావడం లేదు.

దర్శకుడు అట్లీ వర్క్ స్టైల్ చాలా గ్రాండ్‌గా ఉంటుంది. విజువల్స్ పర్ఫెక్ట్‌గా వచ్చే వరకు ఆయన రాజీ పడరు. ప్రస్తుతం అందుతున్న సమాచారం ప్రకారం, గ్లింప్స్ లేదా టీజర్‌కు సంబంధించిన పనులు ఇంకా పూర్తి కాలేదని తెలుస్తోంది. నిర్ణీత సమయానికి వీడియో అవుట్‌పుట్ వస్తుందో లేదో అని అట్లీ టీమ్ కొంత సందిగ్ధంలో ఉన్నట్లు సమాచారం. ఒకవేళ వీడియో రెడీ కాకపోతే, కేవలం టైటిల్ పోస్టర్‌తోనే సరిపెట్టాల్సి వస్తుంది. ఇది బన్నీ అభిమానులకు కొంత నిరాశ కలిగించే విషయమే.

గతంలో వచ్చిన వార్తల ప్రకారం, ఈ సినిమా కోసం సాయి అభ్యంకర్ అదిరిపోయే బ్యాక్‌గ్రౌండ్ స్కోర్ రెడీ చేశారట. ఒకవేళ గ్లింప్స్ గనుక వస్తే అది ఇంటర్నేషనల్ లెవల్‌లో ఉంటుందని అంతా భావిస్తున్నారు. షారుఖ్ ఖాన్ చేతుల మీదుగా ఈ అప్‌డేట్‌ను లాంచ్ చేయించే ప్లాన్ కూడా జరుగుతోంది. ఇంత పెద్ద ప్లానింగ్ ఉన్నప్పుడు వీడియో కంటెంట్ లేకపోతే ఆ ఇంపాక్ట్ తగ్గే అవకాశం ఉంది. అందుకే చివరి నిమిషం వరకు టీమ్ కష్టపడుతూనే ఉంది.

ఈ సినిమా కథాంశం గురించి కూడా ఇప్పటికే రకరకాల చర్చలు నడుస్తున్నాయి. టైమ్ ట్రావెల్ కాన్సెప్ట్‌తో పాటు తండ్రీకొడుకుల మధ్య ఉండే ఎమోషన్స్ ఈ సినిమాలో ప్రధానంగా ఉండబోతున్నాయి. దీపికా పదుకొణె, రష్మిక మందన్న, మృణాల్ ఠాకూర్ వంటి స్టార్ హీరోయిన్లు నటిస్తుండటంతో ఈ ప్రాజెక్ట్ మీద అంచనాలు భారీగా ఉన్నాయి. సన్ పిక్చర్స్ లాంటి పెద్ద బ్యానర్ నిర్మిస్తుండటంతో క్వాలిటీ విషయంలో ఎక్కడా తగ్గకూడదని మేకర్స్ భావిస్తున్నారు. ఏప్రిల్ 7వ తేదీ లేదా ఏప్రిల్ 8న ఈ అప్‌డేట్ వచ్చే ఛాన్స్ ఉంది. అప్పటివరకు ఈ కన్ఫ్యూజన్ ఇలాగే కొనసాగేలా కనిపిస్తోంది.