తెలుగులో దురంధర్ ఊచకోత

దురంధర్ ది రివెంజ్ డబ్బింగ్ వెర్షన్లు ఎట్టకేలకు వాయిదాల మీద వాయిదాలు పడి రెండు రోజుల తర్వాత థియేటర్లలో షోలు మొదలుపెట్టాయి. నిన్నటిదాకా హిందీ వెర్షన్ తో సర్దుకున్నా ఇప్పుడు సీన్ మారిపోయింది. మాములుగా ఇలాంటి అనువాదం చేసిన రా అండ్ రస్టిక్ బాలీవుడ్ మూవీస్ కి ఏపీ తెలంగాణ బిసి సెంటర్లలో పెద్దగా ఆదరణ ఉండదు. కానీ దీనికి మాత్రం హైదరాబాద్ నుంచి అనంతపూర్ దాకా ప్రతి చోటా సోల్డ్ అవుట్ బోర్డులే కనిపిస్తున్నాయి.

బుక్ మై షో ఓపెన్ చేస్తే భాగ్యనగరంలో ఒక్క టికెట్ ముక్క లేదు. హిందీ కూడా ముందు వరసలో ఉన్న సీట్లు తప్ప అన్నీ అమ్ముడుపోయాయి. వీకెండ్ ఏదైనా కోరుకున్న థియేటర్ లో కావాలనుకున్న సీట్లో దురంధరే రివెంజ్ చూడాలంటే సాధ్యమయ్యేలా లేదు. ఒకపక్క ఉస్తాద్ భగత్ సింగ్ ఉన్నప్పటికీ మెజారిటీ ఆడియన్స్ ఛాయస్ దురంధర్ 2 అవుతోంది. స్క్రీన్లు పెంచాల్సిందిగా డిస్ట్రిబ్యూటర్ల మీద ఒత్తిడి వస్తున్నా ఏం చేయలేని పరిస్థితి నెలకొంది.

గతంలో యానిమల్, జవాన్, పఠాన్ లాంటివి డబ్బింగ్ వెర్షన్లు రిలీజయ్యాయి కానీ ఈ స్థాయిలో రాంపేజ్ అయితే చూపించలేదు. నమ్మలేని జోక్ ఏంటంటే ఆడియన్స్ లో కొందరు మొదటి భాగం చూడకపోయినా సీక్వెల్ కోసం పరుగులు పెడుతున్నారు. నాలుగు గంటల నిడివి ఉందని తెలిసీ ఇంతగా హిందీ సినిమాను ఓన్ చేసుకోవడం చూస్తే తెలుగు సినీ ప్రియుల అభిమానం మంచి కంటెంట్ మీద ఏ స్థాయిలో ఉందో అర్థమవుతుంది.

రాబోయే పది రోజులు పరిస్థితి ఇలాగే ఉంటుందని బయ్యర్లు అంచనా వేస్తున్నారు. వచ్చే వారం యూత్, బ్యాండ్ మేళం లాంటి కొత్త రిలీజులు ఉన్నప్పటికీ వాటి మీద పెద్దగా అంచనాలు లేని దృష్ట్యా యునానిమస్ టాక్ తెచ్చుకుంటే తప్ప దురంధర్ తాకిడిని తట్టుకోలేవు. కొన్ని చోట్ల ఉస్తాద్ భగత్ సింగ్ రేట్లు కొంత తగ్గించారని అంటున్నారు. ఇది నిజమైతే అన్ని చోట్ల వీలైనంత త్వరగా అమలు చేయాలి. అప్పుడే దురంధర్ రివెంజ్ కాంపిటీషన్ ఎదురుకోవడం మరింత సులువవుతుంది.