అనిల్ కౌంటర్ ఇచ్చాడండోయ్

గ‌త ఏడాది సంక్రాంతి పండ‌క్కి సంక్రాంతికి వ‌స్తున్నాంతో సెన్సేష‌నల్ హిట్ ఇచ్చిన అనిల్ రావిపూడి.. ఈ ఏడాది మ‌న శంక‌ర వ‌ర‌ప్ర‌సాద్ గారుతో అంత‌కుమించి సంచ‌ల‌నం రేపాడు. భోళాశంక‌ర్ లాంటి డిజాస్ట‌ర్ త‌ర్వాత చిరుకు ఇలాంటి హిట్టు ఇవ్వ‌డంతో అనిల్ పేరు మార్మోగింది. అత‌ను టాలీవుడ్లో హాట్ షాట్ డైరెక్ట‌ర్‌గా మారిపోయాడు.

ఈ నేప‌థ్యంలో త‌న కొత్త చిత్రం మీద స‌ర్వ‌త్రా అమితాస‌క్తి నెల‌కొంది. ముందుగా దిల్ రాజు నిర్మాణంలో విక్ట‌రీ వెంక‌టేష్ హీరోగా అనిల్ రావిపూడి సినిమా ఉండొచ్చ‌న్న సంకేతాలు వ‌చ్చాయి. ఐతే గ‌త కొన్ని రోజుల్లో ఈ ప్రాజెక్టుకు సంబంధించి చాలా అప్‌డేట్స్ క‌నిపిస్తున్నాయి సోష‌ల్ మీడియాలో.

ఇందులో ఫాహ‌ద్ ఫాజిల్ ఓ ముఖ్య పాత్ర పోషిస్తున్నాడ‌ని.. అత‌డికి జోడీగా ఆషికా రంగ‌నాథ్ న‌టిస్తుంద‌ని.. వెంకీ స‌ర‌స‌న పూజా హెగ్డే, కీర్తి సురేష్ హీరోయిన్ల‌ని.. ఈ సినిమా క‌థ ఇలా ఉంటుంది అలా ఉంటుంది అంటూ వార్తలు వినిపించాయి.

ఈ ప్ర‌చారం రోజు రోజుకూ విస్తృతం అవుతుండ‌డంతో అనిల్ రావిపూడి సోష‌ల్ మీడియా వేదిక‌గా స్పందించాడు. అత‌ను త‌న‌దైన శైలిలో ఫ‌న్నీగా ఒక పోస్టు పెట్టాడు. ”నేను పేపర్ మీద కలం కూడా పెట్టలేదు ఇంకా. నటినటులు, కధ, టైటిల్ కూడా పెట్టేసారు. ఈ ఫ్లో చూస్తుంటే ..యాక్షన్..కట్ కూడా చెప్పేస్తారేమో. మీ ఉత్సాహన్ని నేను అర్థం చేసుకోగలను.. అలాగే నేను చేసే సినిమా ఏంటి ఎవరితో అనేది అతి త్వరలో… నిజమైన పూర్తి వివరాలు… మీకు అందిస్తాం” అని అనిల్ రావిపూడి పేర్కొన్నాడు.

ఇదంతా అనిల్ ప్లాన్ అని.. లీకులు ఇచ్చి ఇటువంటి కౌంటర్ పోస్టులు పెట్టడం ద్వారా ఎక్కువ బజ్ వస్తుందని ఇలానే స్ట్రాటజీ ఫాలో అవుతారని కొంత మంది సరదాగా పోస్టులు కూడా పెడుతున్నారు. ఏదైనా అధికారికంగా వెలువడితేనే మంచిదని.. లేదంటే బజ్ పరంగా భిన్నాభిప్రాయాలు ఏర్పడతాయనేది సినీ విశ్లేషకుల మాట.

త‌న కొత్త సినిమా గురించి మ‌న శంక‌ర వ‌ర‌ప్ర‌సాద్ గారు పోస్ట్ రిలీజ్ ప్ర‌మోష‌న్ల‌లో మాట్లాడుతూ.. ఒక క్రేజీ ఐడియా వ‌చ్చింద‌ని, టైటిల్ కూడా వెరైటీగా ఉంటుంద‌ని.. దాని మీద వ‌ర్క్ చేయ‌బోతున్నాన‌ని చెప్పాడు అనిల్. ముందు అనిల్ నెక్స్ట్ మూవీ సంక్రాంతికి వ‌స్తున్నాం సీక్వెల్ అని ప్ర‌చారం జ‌రిగింది. కానీ కొత్త క‌థ‌తో అత‌ను వెళ్ల‌బోతున్నాడ‌ని స్ప‌ష్ట‌మ‌వుతోంది. మ‌రి అనిల్ త్వ‌ర‌లో ఏం అప్‌డేట్ ఇస్తాడో చూడాలి.