క్రిష్‌-4కు మ‌ళ్లీ బ్రేక్‌?

క్రిష్‌-4.. ద‌శాబ్దం కింద‌ట్నుంచి చ‌ర్చ‌ల్లో ఉన్న సినిమా. హృతిక్ రోష‌న్ హీరోగా అత‌డి తండ్రి తీసిన కోయీ మిల్‌గ‌యా పెద్ద హిట్ కాగా.. దానికి కొన‌సాగింపుగా ఇదే కాంబినేష‌న్లో రూపొందిన క్రిష్‌, క్రిష్‌-3 ఇంకా పెద్ద విజ‌యాలు సాధించాయి. దీంతో ఈ ఫ్రాంఛైజీలో నాలుగో సినిమా అయిన క్రిష్‌-4ను ఇంకా భారీగా తీయాల‌నుకున్నాడు రాకేష్ రోష‌న్.

కానీ ఒకవైపు బడ్జెట్ ఇబ్బందులు, రాకేష్ రోషన్ ఆరోగ్య సమస్యలు ఈ సినిమాకు అడ్డంకిగా మారాయి. క్యాన్సర్ నుంచి కోలుకున్నాక కూడా ఈ సినిమాను పట్టాలెక్కించడానికి చాలా ప్రయత్నించాడు రాకేష్. కానీ ఆయన వల్ల కాలేదు.

ఈ సినిమా ద‌ర్శ‌క‌త్వ బాధ్య‌త‌ల నుంచి రాకేశ్ త‌ప్పుకోగా.. చివ‌రికి హృతిక్ రోష‌నే మెగా ఫోన్ ప‌ట్ట‌డానికి రెడీ అయ్యాడు. య‌శ్ రాజ్ ఫిలిమ్స్ లాంటి పెద్ద నిర్మాణ సంస్థ ప్రొడ్యూస్ చేయ‌డానికి కూడా రెడీ అయింది. వార్-2 త‌ర్వాత ఏ సినిమా చేయ‌కుండా కొన్ని నెల‌లుగా ఈ ప్రాజెక్టు కోస‌మే స‌మ‌యం వెచ్చిస్తున్నాడు హృతిక్.

ఇక సినిమా ప‌ట్టాలెక్క‌డ‌మే త‌రువాయి అనుకుంటే.. ఇప్పుడు మ‌ళ్లీ బ్రేక్ ప‌డిన‌ట్లుగా బాలీవుడ్ మీడియా చెబుతోంది. బ‌డ్జెట్ స‌మ‌స్య‌ల వ‌ల్లే క్రిష్‌-2 ముందుకు కద‌ల‌ట్లేద‌ట‌. హృతిక్ అండ్ టీం వేసుకున్న ప్ర‌ణాళిక‌ల ప్ర‌కారం ఈ సినిమాకు రూ.500 కోట్లు ఖ‌ర్చ‌వుతుంద‌ట‌. అంత పెట్టి సినిమా తీసి వ‌ర్క‌వుట్ చేయ‌డం క‌ష్ట‌మ‌న్న‌ది య‌శ్ రాజ్ ఫిలిమ్స్ భావ‌న‌ట‌.

బ‌డ్జెట్‌ను రూ.350 కోట్ల‌కు త‌గ్గిస్తే సినిమాను ప్రొడ్యూస్ చేస్తామ‌ని నిర్మాత ఆదిత్య చోప్రా స్ప‌ష్టం చేసిన‌ట్లు స‌మాచారం. దీంతో ఆ మేర‌కు స్క్రిప్టు మార్చే ప‌నిలో ఉంద‌ట హృతిక్ టీం. ఐతే స్క్రిప్టు మారిస్తే సినిమా స్కేల్ త‌గ్గిపోతుంద‌ని.. అనుకున్నంత గొప్ప‌గా ఉండ‌ద‌ని హృతిక్ బృందం ఆలోచిస్తోంద‌ట‌.

ఈ నేప‌థ్యంలో వేరే ఏదైనా ప్రొడ‌క్ష‌న్ హౌస్ రూ.500 కోట్ల బ‌డ్జెట్ పెట్ట‌డానికి ముందుకు వ‌స్తుందేమో అని ప్ర‌త్యామ్నాయం కూడా చూస్తున్న‌ట్లు స‌మాచారం. అలా కాని ప‌క్షంలో స్క్రిప్టు మార్చుకుని సినిమాను సెట్స్ మీదికి తీసుకెళ్ల‌డానికి ఇంకా స‌మ‌యం ప‌ట్టొచ్చు.