నిరసనల దెబ్బకు దిగి వచ్చిన నెట్ ఫ్లిక్స్

మనోజ్ బాజ్ పాయ్ హీరోగా రూపొందిన ఓటిటి మూవీ ఘుస్కోర్ పండత్ త్వరలో నెట్ ఫ్లిక్స్ లో విడుదల కాబోతున్న సంగతి తెలిసిందే. అయితే టైటిల్ లో ఒక సామజిక వర్గాన్ని అవమానపరిచేలా లంచగొండి పండితుడు అని పెట్టడం పట్ల అభ్యంతరం వ్యక్తం చేస్తూ సోషల్ మీడియాలో తీవ్ర నిరసన రేగింది.

తొలుత ట్వీట్లకే పరిమితమైనప్పటికీ తర్వాత కోర్టులు, కేసులు, పోలీసులు అంటూ పలువురు న్యాయ స్థానాన్ని ఆశ్రయించడంతో నెట్ ఫ్లిక్స్ ఈ కంటెంట్ కు సంబంధించిన వీడియోలు, పోస్టర్లు తొలగించేసింది. వివాదం పరిష్కారం అయ్యేదాకా ఇప్పుడప్పుడే దాని ప్రస్తావన రాకపోవచ్చు. సో ఆగ్రహాలు కొంత చల్లారొచ్చు.

షో క్రియేటర్ నీరజ్ పాండే, మనోజ్ బాజ్ పాయ్ ఇద్దరూ దీని గురించి స్పందిస్తూ అందరి మనోభావాలను గౌరవిస్తున్నామని, ఎవరినో అవమానపరచాలని ఇది తీయలేదని, అయినా సరే కొందరు బాధ పడ్డారు కాబట్టి వాళ్ళకు క్షమాపణ చెబుతూ తదుపరి చర్యలకు ఉపక్రమిస్తామని అందులో పేర్కొన్నారు.

సో టైటిల్ మార్పు దాదాపు ఖాయమే. లంచాలకు మరిగిన ఒక పోలీస్ ఆఫీసర్ జీవితంలో జరిగిన సంఘటనల ఆధారంగా ఘుస్కోర్ పండత్ రూపొందింది. ట్రైలర్ అంచనాలు పెంచడంలో ఉపయోగపడింది. ఇప్పుడు చూద్దామన్నా యూట్యూబ్ లో తీసేశారు. సో పేరు మార్పు దాకా వెయిట్ చేయాలి.

మెచ్చుకోవాల్సిన విషయం ఏంటంటే జనాలు ఇంత వేగంగా రియాక్ట్ కావడం. ఒక వర్గాన్ని, మతాన్ని, కులాన్ని కించపరిచే హక్కు ఎవరికీ లేదు. అలాంటి అవకాశం ఉందని తెలిసినప్పుడు దర్శక నిర్మాతలు తమ పద్ధతి మార్చుకోవాలి. అంతే తప్ప క్రియేటివ్ ఫ్రీడమ్ పేరుతో ఇలా చేస్తామంటే కుదరదు.

గతంలో గద్దలకొండ గణేష్ సినిమా విషయంలో ఇలాంటి కాంట్రావర్సి వచ్చిన సంగతి తెలిసిందే. ముందు నిర్ణయించిన వాల్మీకి టైటిల్ మార్చే దాకా వివాదం చల్లారలేదు. కొమరం పులి టైంలోనూ ఇలాగే జరిగింది. మరి నీరజ్ పాండే బృందం ఇప్పుడు ఎలాంటి పేరు ఎంచుకుంటారో వేచి చూడటం తప్ప ఆప్షన్ లేదు.