ఓవైపు చిరుతో.. మ‌రోవైపు విష్ణుతో

మ్యాట్నీ ఎంట‌ర్టైన్మెంట్స్.. టాలీవుడ్లో కొంచెం పేరున్న బేన‌రే. కాక‌పోతే సొంతంగా ఆ సంస్థ సినిమాలు తీయ‌దు. ఇంకేదైనా పేరున్న బేన‌ర్ చూసుకుని దాని భాగస్వామ్యంలో సినిమాలు నిర్మిస్తుంటుంది. గ‌గ‌నం, ఘాజి, క్ష‌ణం స‌హా మంచి విష‌యం ఉన్న సినిమాలు చెప్పుకోద‌గ్గ సంఖ్య‌లోనే ఆ సంస్థలో తెర‌కెక్కాయి. ఐతే ఇప్ప‌టిదాకా లో బ‌డ్జెట్ సినిమాలే తీస్తూ వ‌చ్చిన మ్యాట్నీ ఎంట‌ర్టైన్మెంట్స్ తొలిసారిగా ఓ భారీ చిత్రాన్ని లైన్లో పెట్టింది. అదే.. ఆచార్య‌.

రామ్ చ‌ర‌ణ్ ఆధ్వ‌ర్యంలోని కొణిదెల ప్రొడ‌క్ష‌న్స్‌తో క‌లిసి మెగాస్టార్-కొర‌టాల శివ‌ల క్రేజీ కాంబినేషన్లో ఈ చిత్రాన్ని నిర్మిస్తున్నారు మ్యాట్నీ ఎంట‌ర్టైన్మెంట్స్ అధినేత నిరంజ‌న్ రెడ్డి. ఓవైపు అంత పెద్ద సినిమా తీస్తూ.. ఇంకోవైపు ఓ చిన్న సినిమాను ఈ సంస్థ మొద‌లుపెట్టింది. ఇంకా పేరు పెట్ట‌ని ఆ సినిమాలో హీరో శ్రీ విష్ణు.

కొంత కాలం కింద‌ట ఆహాలో నేరుగా విడుద‌లైన జోహార్ సినిమాతో ద‌ర్శ‌కుడిగా ప‌రిచ‌యం అయిన తేజ మ‌ర్ని ఈ సినిమాను రూపొందించ‌నున్నాడు. గురువార‌మే ఈ చిత్రం ప్రారంభోత్స‌వం జ‌రుపుకుంది. బ్రోచేవారెవ‌రురా ద‌ర్శ‌కుడు వివేక్ ఆత్రేయ, ఏజెంట్ సాయిశ్రీనివాస ఆత్రేయ ఫేమ్ స్వ‌రూప్ త‌దిత‌రులు ఈ వేడుక‌లో పాల్గొన్నారు. ఈ చిత్రంలో విజిల్‌ సినిమా ఫేమ్, 30 రోజుల్లో ప్రేమించ‌డం ఎలా క‌థానాయిక అమృత నాయ‌ర్ క‌థానాయిక‌గా న‌టించ‌నుంది.

శ్రీవిష్ణు గ‌త ఏడాది బ్రోచేవారెవ‌రురా సినిమాతోనే కెరీర్లో బిగ్గెస్ట్ హిట్ కొట్టాడు. ఆ త‌ర్వాత రాజ రాజ చోర అనే సినిమా చేశాడు. అది విడుద‌ల‌కు సిద్ధంగా ఉంది. ఈ మ‌ధ్యే రాజేంద్ర ప్ర‌సాద్ కాంబినేష‌న్లో అనీష్ కృష్ణ ద‌ర్శ‌క‌త్వంలో గాలి సంప‌త్ అనే సినిమాను మొద‌లుపెట్టాడు. అది శ‌ర‌వేగంగా షూటింగ్ జ‌రుపుకుంటోంది. అది పూర్త‌య్యేలోపే తేజ మ‌ర్ని ద‌ర్శ‌క‌త్వంలో మ్యాట్నీ ఎంట‌ర్టైన్మెంట్స్ లాంటి పెద్ద బేన‌ర్లో సినిమాను లైన్లో పెట్టాడు.