అవతార్ నిప్పు ఆరిపోయింది

ఇటీవలే విడుదలైన అవతార్ ఫైర్ అండ్ యాష్ మీద ఇండియాలో కూడా ఏ స్థాయిలో అంచనాలున్నాయో ముందు నుంచి చూస్తూనే ఉన్నాం. డిసెంబర్ 19 రిలీజైన ఈ విజువల్ వండర్ కు మన దగ్గర మిశ్రమ స్పందన దక్కింది. టెక్నికల్ గా ఎంత గొప్పగా ఉన్నా దర్శకుడు జేమ్స్ క్యామరూన్ నిరాశ పరిచారని, మరీ నెమ్మదించిన కథనంతో పాత కథనే చూపించారనే కామెంట్స్ ఎక్కువ వినిపించాయి.

అందులోనూ మూడుంపావు గంటల నిడివిని ఆడియన్స్ భరించలేకపోతున్నారు. వీరాభిమానులు ఎంజాయ్ చేస్తున్నారు కానీ న్యూట్రల్ ప్రేక్షకులు పెదవి విరిచారు. దీంతో వీకెండ్ తర్వాత డ్రాప్ అయ్యింది.

ట్రేడ్ టాక్ ప్రకారం అవతార్ ఫైర్ అండ్ యష్ ఇండియాలో వసూలు చేసిన మొత్తం సుమారు 85 కోట్ల దాకా ఉందట. పెట్టుకున్న టార్గెట్ 450 కోట్ల పైమాటే. ఇప్పుడీ ఫిగర్ చేరుకోవడం అసాధ్యం. ఎందుకంటే దురంధర్ దూకుడు ఇంకా కొనసాగుతోంది. తెలుగు, తమిళ భాషల్లో కొత్త రిలీజులు చాలా ఉన్నాయి.

ఈ నేపథ్యంలో అవతార్ 3 ఏదో అద్భుతం చేయడం అనుమానమే. వీక్ డేస్ ఆక్యుపెన్సీలు ఇరవై శాతం లోపే నమోదు కావడం బయ్యర్ వర్గాలను ఆందోళన పరుస్తోంది. మొన్న ఆదివారం బాగానే హౌస్ ఫుల్స్ పడ్డాయి కానీ ఒక్కసారిగా సోమవారం నుంచి డ్రాప్ తీవ్రంగా ఉండటం డేంజర్ బెల్ లాంటిది.

ఎలా చూసుకున్నా అవతార్ ఫైర్ అండ్ యాష్ మన దేశం వరకు డిజాస్టర్ అయ్యేలా ఉంది. ఇది సక్సెస్ కాకపోతే ఇకపై ఫ్రాంచైజ్ ఆపేస్తానని చెప్పిన దర్శకుడు జేమ్స్ క్యామరూన్ ఆ మాట మీద ఉంటారా లేదా అనేది వేచి చూడాలి. ఫలితం ముందే ఊహించారు కాబోలు వేరే కథలు రాసుకునే పనిలో పడ్డారట.

ఒకవేళ అవతార్ 4 తో ప్రొసీడ్ అయితే మాత్రం మునుపటి భాగాలంత హైప్ అయితే ఖచ్చితంగా రాదు. అవతార్, అవతార్ 2 వే అఫ్ వాటర్ కన్నా బాగా వెనుకబడిపోయిన అవతార్ 3 ఈ స్థాయిలో ఫ్లాప్ అవుతుందని ఎవరూ ఊహించలేదు. సిచువేషన్ చూస్తుంటే నూటా యాభై కోట్లు కూడా అనుమానంగానే ఉంది.