అవతార్-3 రివ్యూలు వచ్చేశాయ్

2009లో ప్రపంచ సినీ చరిత్రలోనే అతి పెద్ద బ్లాక్ బస్టర్‌గా నిలిచిన చిత్రం ‘అవతార్’. ఆ సినిమాకు కొనసాగింపుగా ఏకంగా నాలుగు సీక్వెల్స్ అనౌన్స్ చేశాడు దర్శక నిర్మాత జేమ్స్ కామెరూన్. అందులో తొలి సీక్వెల్ ‘అవతార్: ది వే ఆఫ్ వాటర్’ మూడేళ్ల ముందు రిలీజైంది. కానీ ఆ చిత్రం అంచనాలను అందుకోలేకపోయింది. సుదీర్ఘ నిడివితో, కొత్తదనం లేని విజువల్స్‌తో ఒకింత బోర్ కొట్టించిందా సినిమా. కానీ ప్రి రిలీజ్ హైప్ వల్ల వసూళ్లకేమీ ఢోకా లేకపోయింది.

‘అవతార్’లో కాకపోయినా భారీ వసూళ్లే సాధించిందీ చిత్రం. ఇప్పుడు కామెరూన్ ‘అవతార్-3’తో రెడీ అయ్యాడు. ఈ శుక్రవారమే ప్రపంచవ్యాప్తంగా ఈ సినిమా ప్రేక్షకులను పలకరించబోతోంది. ‘అవతార్-2’ అనుభవం దృష్ట్యా మూడో భాగం మీద మరీ అంచనాలేమీ లేవు. ఆ సంగతి అడ్వాన్స్ బుకింగ్స్‌లోనూ ప్రతిఫలిస్తోంది. దీనికి తోడు ‘అవతార్-3’ రివ్యూలు కూడా అంత ఆశాజనకంగా కనిపించడం లేదు.

హాలీవుడ్లో ఆల్రెడీ ఈ సినిమాకు ప్రిమియర్స్ పడ్డాయి. రివ్యూలు మోడరేట్‌గా ఉన్నాయి. రోటన్ టమోటాస్ 70 పర్సంట్ రేటింగ్ ఇచ్చింది ఈ చిత్రానికి. అవతార్, అవతార్-2లతో పోలిస్తే మూడో భాగానికి ఆ సంస్థ రేటింగ్ తగ్గించింది. బీబీసీ సైతం ‘అవతార్-3’కి నెగెటివ్ రివ్యూనే ఇచ్చింది. ముఖ్యంగా నిడివి విషయంలో అసంతృప్తి వ్యక్తం చేసిన బీబీసీ.. అవతార్ సిరీస్‌ను కామెరూన్ ఇంతటితో ఆపేస్తే బెటరని వ్యాఖ్యానించడం గమనార్హం.

వెరైటీ సంస్థ మాత్రం ‘అవతార్-3’కి పాజిటివ్ రివ్యూ ఇచ్చింది. మిగతా రివ్యూల్లో కొన్ని పాజిటివ్‌గా, కొన్ని నెగెటివ్‌గా ఉన్నాయి. ఓవరాల్‌గా చూస్తే మాత్రం మెజారిటీ సమీక్షలు నెగెటివ్‌గానే ఉన్నాయి. విజువల్‌గా బాగుంటున్నప్పటికీ ‘అవతార్’ ఓవర్ డోస్ అయిపోతోందని, 3 గంటలకు పైగా నిడివిని భరించడం కష్టమనే అభిప్రాయాలు వ్యక్తమవుతున్నాయి.