బాహుబలి తిరిగొచ్చాడు… కోత మొదలైంది

కొన్నేళ్ల నుంచి టాలీవుడ్లో నడుస్తున్న రీ రిలీజ్ ట్రెండులో ఒకప్పుడు ఒక పీక్స్ చూడబోతున్నాం. ‘బాహుబలి: ది బిగినింగ్’, ‘బాహుబలి: ది కంక్లూజన్’ చిత్రాలతో తెలుగు సినిమా చరిత్రను మార్చిన రాజమౌళి అండ్ కో.. ఇప్పుడు మరో సంచలనానికి సిద్ధమైంది. ఇండియన్ సినిమాలో ఎన్నడూ లేని విధంగా రెండు భాగాలుగా విడుదలైన సినిమాను కలిపి ఒకటిగా విడుదల చేయబోతోంది. అదే.. బాహుబలి: ది ఎపిక్.

ఈ పని ఏదో మొక్కుబడిగా చేయకుండా ఒక కొత్త సినిమాకు పని చేసినట్లు కొన్ని వారాల పాటు రాజమౌళి బృందమంతా కలిసి ఎడిటింగ్ మీద కూర్చుంది. మూడు ముప్పావు గంటల నిడివితో ఈ చిత్రాన్ని ఈ నెల 31న ప్రేక్షకుల ముందుకు తేబోతోంది. ఆల్రెడీ యుఎస్ సహా పలు దేశాల్లో అడ్వాన్స్ బుకింగ్స్ మొదలయ్యాయి. స్పందన చాలా బాగుంది. ఇప్పుడు తెలుగు రాష్ట్రాల్లోనూ అడ్వాన్స్ బుకింగ్స్ ఆరంభించారు. రెస్పాన్స్ అదిరిపోతోంది.

ఒక కొత్త సినిమా తరహాలో ‘బాహుబలి: ది ఎపిక్’కు 31న ఉదయం 8 గంటల నుంచే షోలు పడబోతున్నాయి. వాటి టికెట్ల కోసం డిమాండ్ కూడా గట్టిగానే ఉంది. బుకింగ్స్ ఓపెనైన కాసేపటికే ఫాస్ట్ ఫిల్లింగ్ మోడ్‌లోకి వచ్చేశాయి. కొన్ని షోలు ఆల్రెడీ సోల్డ్ ఔట్ అయిపోయాయి కూడా. గంటకు 5 వేలకు ‘బాహుబలి: ది ఎపిక్’ టికెట్లు తెగుతున్నాయంటే ప్రేక్షకులు ఈ సినిమాపై ఎంత ఆసక్తితో ఉన్నారో అర్థమవుతుంది.

నిన్ననే ‘బాహుబలి: ది ఎపిక్’ ట్రైలర్ లాంచ్ చేశారు. దాని క్వాలిటీ మామూలుగా లేదు. తెలిసిన కథ.. చూసిన సినిమానే అయినా.. మళ్లీ ప్రేక్షకులకు ఒక కొత్త అనుభూతిని పంచేలా కనిపిస్తోంది ‘బాహుబలి: ది ఎపిక్’. ఇండియాలో రీ రిలీజ్ రికార్డులన్నింటినీ ‘బాహుబలి’ బద్దలు కొట్టడం లాంఛనమే. ఫుల్ రన్లో ఈ చిత్రానికి వంద కోట్లకు తక్కువ కాకుండా వసూళ్లు రాబట్టి ఎవ్వరూ అందుకోని రికార్డును నెలకొల్పుతుందని అంచనా వేస్తున్నారు.