మూడేళ్లలో ఒక్క సినిమా.. ఏడాదిలో మూడు సినిమాలు

ఒకప్పుడు విరామం లేకుండా సినిమాలు చేస్తూ.. అడపాదడపా హిట్లు కొడుతూ ఉండేవాడు శర్వానంద్. కానీ 2022లో ‘ఒకే ఒక జీవితం’తో ఓ మోస్తరు ఫలితాన్ని అందుకున్నాక అనూహ్యంగా అతడి కెరీర్లో పెద్ద గ్యాప్ వచ్చేసింది. రెండేళ్ల పాటు తన నుంచి సినిమానే రిలీజ్ కాలేదు. ఈ విరామం తర్వాత గత ఏడాది ‘మనమే’ సినిమాతో పలకరించాడు శర్వా. కానీ ఆ సినిమా అతడికి నిరాశనే మిగిల్చింది.

ఈ ఏడాది శర్వా నుంచి రిలీజే లేదు. అంటే మూడేళ్ల వ్యవధిలో కేవలం ఒక్క రిలీజ్‌తో సరిపెట్టాడు శర్వా. ఒక యంగ్ హీరో కెరీర్లో ఇలాంటి గ్యాప్ రావడం తన కెరీర్‌కు తీవ్ర ఇబ్బంది కలిగించే విషయమే. ఐతే ఈ గ్యాప్‌నంతా వచ్చే ఏడాది కవర్ చేసేయబోతున్నాడు శర్వా. 2026లో అతడి సినిమాలు మూడు రిలీజయ్యే సంకేతాలు కనిపిస్తున్నాయి.

‘సామజవరగమన’ దర్శకుడు రామ్ అబ్బరాజు దర్శకత్వంలో శర్వా నటిస్తున్న ఫ్యామిలీ ఎంటర్టైనర్ ‘నారీ నారీ నడుమ మురారి’ వచ్చే సంక్రాంతికి షెడ్యూల్ అయింది. ఆ సీజన్లోనే సినిమా వస్తుందా లేదా అనే సందేహాలున్నాయి. కానీ పండక్కి మిస్ అయినా ఇంకో నెలరోజుల్లోపే సినిమా విడుదలయ్యే అవకాశముంది. ఇక వేసవికి ‘బైకర్’ సినిమాతో పలకరించబోతున్నాడు శర్వా.

‘లూజర్’ వెబ్ సిరీస్ దర్శకుడు అభిలాష్ రెడ్డి ఈ చిత్రాన్ని రూపొందిస్తున్నాడు. శర్వాకు కెరీర్లో ఇదొక వెరైటీ ఫిలిం అవుతుందని భావిస్తున్నారు. మరోవైపు శర్వా ‘భోగి’ అనే ఊర మాస్ సినిమా ఒకటి చేస్తున్నాడు. దానికి సంపత్ నంది దర్శకుడు. ఆ సినిమా సైలెంటుగా చిత్రీకరణ జరుపుకుంటోంది. ఈ చిత్రం వచ్చే ఏడాది ద్వితీయార్ధంలో విడుదలయ్యే అవకాశాలున్నాయి. మరోవైపు శ్రీను వైట్ల దర్శకత్వంలోనూ శర్వా ఒక సినిమా చేయబోతున్నాడు కానీ.. అది వచ్చే ఏడాది రాకపోవచ్చు. 2026లో శర్వా నుంచి మూడు రిలీజ్‌లు ఉండడం మాత్రం పక్కా.