ప్రదీప్ భలే కనెక్ట్ అవుతున్నాడు

మిడిల్ క్లాస్ కుర్రాడిగా అచ్చం మన పక్కింట్లో ఉండే సగటు యువకుడిగా కనిపించే ప్రదీప్ రంగనాథన్ క్రమంగా యూత్ కి మరింత దగ్గరవుతున్నాడు. డ్యూడ్ కు వస్తున్న వసూళ్లే దానికి నిదర్శనం. తమిళంలో అంటే ఏమో అనుకోవచ్చు కానీ తెలుగులోనూ మంచి ఓపెనింగ్స్ తేవడం మనోళ్లకు ఎంతగా కనెక్ట్ అయ్యాడో తేటతెల్లం చేస్తోంది. ఒరిజినల్ వెర్షన్ కు బైసన్ రూపంలో గట్టి పోటీ తగలడంతో అక్కడ కొంచెం పికప్ స్లోగా ఉంది కానీ తెలుగులో కె ర్యాంప్, తెలుసు కదాలు ఉన్నా సరే యూత్ మొదటి ప్రాధాన్యత డ్యూడ్ కావడం విశేషం. ముఖ్యంగా ఏ సెంటర్స్ లో ప్రదీప్ రంగనాథన్ ఆధిపత్యం స్పష్టంగా ఉంది.

నిజానికి డ్యూడ్ మీద మరీ సూపర్ పాజిటివ్ రిపోర్ట్స్ రాలేదు. ఆ మాటకొస్తే పవన్ కళ్యాణ్ బంగారం, తరుణ్ నువ్వే కావాలి – నువ్వు లేక నేను నేను, అల్లు అర్జున్ హ్యాపీ లాంటి పాత తెలుగు సినిమాల ఛాయలు బోలెడు కనిపిస్తాయి. కానీ దర్శకుడు తెలివిగా ఇప్పటి ట్రెండ్ కు అనుగుణంగా కొత్త మసాలాలు జోడించి కాలక్షేపం చేయించాడు. అంత సులభంగా ఒప్పుకోలేని పాయింట్స్ ఇందులో చాలానే ఉన్నాయి కానీ ప్రదీప్ స్క్రీన్ ప్రెజెన్స్ వల్ల చాలా మటుకు అవి కవరైపోయాయి. డ్యూడ్ ముమ్మాటికీ లవ్ టుడే, డ్రాగన్ కంటే మెరుగైన సినిమా కానే కాదు. అయినా ఫెస్టివల్ అడ్వాంటేజ్ లో అలా పని కానిచ్చేసి వసూళ్లు రాబడుతోంది.

ధనుష్, విజయ్ సేతుపతి తరహాలో ప్రదీప్ రంగనాథన్ క్రమంగా నెక్స్ట్ డోర్ బాయ్ ఇమేజ్ తెచ్చుకునే పనిలో ఉన్నాడు. డిసెంబర్ లో రిలీజ్ కాబోయే లవ్ ఇన్సూరెన్స్ కంపెనీ మీద అప్పుడే బజ్ వస్తోందట. విపరీతమైన ఆలస్యం వల్ల ఇప్పటికే లేట్ అయిన ఈ ప్రాజెక్టు నిర్మాతకు ఆర్థికంగా చాలా పెద్ద బరువును మోసేలా చేస్తోంది. ఇప్పుడు క్రమంగా పెరుగుతున్న ప్రదీప్ ఇమేజ్ పుణ్యమాని లవ్ ఇన్సూరెన్స్ కంపెనీ హాట్ కేక్ లా మారేలా ఉందట. కృతి శెట్టి హీరోయిన్ గా నటించిన ఈ వెరైటీ ప్రేమకథలో ఎస్జె సూర్య మరో కీలక పాత్ర పోషిస్తున్నాడు. ఫాంటసీ బ్యాక్ డ్రాప్ లో వచ్చే ఈ మూవీకి విఘ్నేష్ శివన్ దర్శకుడు.