ఒకప్పటి పవన్ హీరోయిన్ షాకింగ్ ఫ్లాష్ బ్యాక్

ఇప్పుడంటే ఓజి నామస్మరణలో అభిమానులు తేలుతున్నారు కానీ కెరీర్ ప్రారంభంలో పవన్ తో పని చేసిన నటీనటులు హీరోయిన్లు పంచుకునే కబుర్లు ఆయనకు సంబంధించినవి కాకపోయినా చాలా ఆసక్తికరంగా ఉంటాయి. గోకులంలో సీతలో పవన్ సరసన నటించిన రాశి అప్పట్లో మంచి స్టార్ డం చూశారు. ప్రేయసి రావే, మానసిచ్చి చూడు, స్నేహితులు, దేవుళ్ళు లాంటి ఎన్నో సూపర్ హిట్లు ఆవిడ ఖాతాలో ఉన్నాయి. చిరంజీవితో అవకాశం వచ్చినట్టే వచ్చి చేజారిపోవడం గురించి ఇప్పటికీ బాధ పడుతూ ఉంటారు. ఈ మధ్య రాశి మళ్ళీ బిజీ అయ్యారు. రెగ్యులర్ గా సినిమాల్లో కనిపిస్తూ పలు విశేషాలు చెబుతున్నారు.

మహేష్ బాబు నిజం టైంలో దర్శకుడు తేజ రాశికి పాజిటివ్ యాంగిల్ లో ఉంటుందని ఒక పాత్ర చెప్పి ఒప్పించారు. హీరోయిన్ కాకపోయినా సరే పెర్ఫార్మన్స్ కు ప్రాధాన్యం ఉందనే ఉద్దేశంతో సరేనన్నారు. సెట్టుకు వెళ్లిన మొదటి రోజే చేయకూడదనిపించే సన్నివేశాన్ని షూట్ చేశారు. దీని వల్ల కెరీర్ దెబ్బ తింటుందని రాశి భయపడి వద్దని చెప్పింది. కానీ చేయాల్సిందేనని కండీషన్ పెట్టడంతో విధి లేక పూర్తి చేయాల్సి వచ్చింది. అనుకున్నట్టే రాశికి నిజం వల్ల డ్యామేజయ్యింది. డబ్బింగ్ టైంలో తేజ క్షమాపణ అడిగినా రాశి అంగీకరించలేదు. జీవితంలో మర్చిపోయే డైరెక్టర్లలో ఆయన పేరే మొదటిదట.

ఇవన్నీ రాశినే ఒక ఇంటర్వ్యూలో పంచుకున్నారు. రంగస్థలంలో అనసూయ కన్నా ముందు రంగమ్మత్త క్యారెక్టర్ ఆఫర్ చేసింది రాశికే, సుకుమార్ చెప్పినప్పుడు బాగానే అనిపించినా ప్రేక్షకులు అంగీకరిస్తారో లేదోననే అనుమానంతో రాశి నో చెప్పేశారు. ఒకవేళ చేసుంటే ఇప్పుడు ఇన్నింగ్స్ మరింత గొప్పగా ఉండేవేమో. తనకు పెళ్ళైన టైంలోనే సౌందర్య చనిపోవడం, నిజం తర్వాత తన పుట్టినరోజునాడే తండ్రి కన్నుమూయడం అత్యంత విషాదాలుగా చెప్పుకునే రాశి మళ్ళీ పవన్, చిరంజీవి లాంటి మెగా హీరోల సినిమాల్లో నటించేందుకు ఉత్సాహం చూపిస్తున్నారు. ఈసారి రంగస్థలం మిస్ చేసుకోవడం లాంటి పొరపాట్లు చేయకపోవచ్చు.