చివరి ఓవర్లో సిక్సులు కొట్టాల్సిందే

నారా రోహిత్ ని సోలో హీరోగా చూసి చాలా కాలమయ్యింది. అందుకే సుందరకాండ మీద గంపెడాశలు పెట్టుకున్నాడు. లక్కీగా టాక్ పాజిటివ్ గా వచ్చింది. మరీ ఎక్స్ ట్రాడినరి అనలేదు కానీ ఈ మాత్రం బాగుంటుందని కూడా చాలా మంది ఊహించకపోవడంతో చిన్న సర్ప్రైజ్ అనిపించింది. కానీ కలెక్షన్లు పెద్దగా లేకపోవడం విచిత్రం. మాములుగా ఇలాంటి చిన్న సినిమాలకు మౌత్ టాక్ మెల్లగా స్ప్రెడ్ అవుతూ రెండో రోజుకల్లా పికపవుతాయి. ఇది చాలాసార్లు జరిగింది. కానీ సుందరకాండకు అలాంటి సూచనలు కనిపించలేదు. దీంతో టీమ్ వెంటనే రంగంలోకి దిగి సక్సెస్ మీట్ పెట్టి పోస్ట్ రిలీజ్ ప్రమోషన్లు షురూ చేసింది.

సమస్యల్లా రోహిత్ కు హీరోగా మార్కెట్ ఎప్పుడో డౌన్ అయిపోవడం. అతని టేస్ట్ మీద ఆడియన్స్ కి గౌరవమున్నా అది థియేటర్ కు వెళ్లి టికెట్లు కొనేంత కాదు. అదిరిపోయిందనే మాట వస్తే తప్ప అంత సులభంగా కదలరు. సుందరకాండకు ఇదే ఇబ్బందిగా మారింది. ఈశ్వర్ హీరోయిన్ శ్రీదేవి రీ ఎంట్రీ,  లియోన్ జేమ్స్ సంగీతం, కమెడియన్ సత్య లాంటి ఎలిమెంట్స్ మరీ ఎక్కువ ఆసక్తిని కలిగించలేకపోయాయి. స్టోరీ పాయింట్ కూడా కొంచెం డిఫరెంట్ గా తీసుకోవడం అన్ని వర్గాల ప్రేక్షకులను కనెక్ట్ చేయించడంలో కొంచెం తడబడింది. ఇవన్నీ కొంచెం ప్రతికూలంగా ప్రభావం చూపించిన మాట వాస్తవం.

అందుకే వీకెండ్ ని కీలకంగా భావించిన సుందరకాండ బృందం సక్సెస్ టూర్ తో ఆడియన్స్ ని కలుసుకోబోతోంది. వైజాగ్, కాకినాడ, రాజమండ్రి, ఏలూరు, విజయవాడ, గుంటూరు, ఒంగోలు, నెల్లూరు, తిరుపతి  ఇలా మొత్తం ఏపీ నగరాలను ఒక రౌండ్ వేయబోతోంది. ఇప్పుడు కనక పికప్ అయితే సెప్టెంబర్ 5 ఘాటీ, మదరాసి వచ్చేదాకా మంచి ఛాన్స్ ఉంటుంది. ఈ వారం రిలీజైన వాటిలో మలయాళం డబ్బింగ్ కొత్త లోక కొంచెం డీసెంట్ టాక్ తో మొదలవ్వగా మిగిలినవి ఎదురీదుతున్నాయి. మరి సుందరకాండ చివరి ఓవర్ లాంటి ఈ అవకాశాన్ని ఎలా వాడుకుంటుందో, జనాన్ని ఎలా రాబడుతోందో చూడాలి.