మంచు లక్ష్మి తెలుగుపై బన్నీ కూతురి కౌంటర్

మంచు లక్ష్మీ ప్రసన్న అచ్చ తెలుగు అమ్మాయే అయినా.. తన భాష, యాస కొంచెం చిత్రంగా ఉంటాయి. చదువు కోసం అమెరికాకు వెళ్లి అక్కడే చాలా ఏళ్లు ఉండి నేటివ్ అమెరికన్ ఇంగ్లిష్ మీద పట్టు సాధించిన లక్ష్మీప్రసన్న.. ఇక్కడికి తిరిగి వచ్చాక కూడా తన మాటల్లో ఆ ప్రభావాన్ని కొనసాగించడంతో వినేవాళ్లకు అదోలా అనిపించింది. తన భాష, యాస మీద ఎప్పట్నుంచో ట్రోలింగ్ జరుగుతున్న సంగతి తెలిసిందే. 

ఐతే దీన్ని మంచు లక్ష్మి సరదాగానే తీసుకుంటూ ఉంటుంది. తన మీద తాను కౌంటర్లు వేసుకోవడానికి కూడా వెనుకాడదు. అలాగే ఇండస్ట్రీ జనాలు కూడా తనను ఈ విషయంలో ఆట పట్టిస్తుంటారు. లక్ష్మి అందుకు ఏమీ ఫీల్ కాదు. తాజాగా అల్లు అర్జున్ ముద్దుల తనయురాలు అల్లు అర్హ.. మంచు లక్ష్మి మీద కౌంటర్ వేయడం విశేషం. సందర్భం ఏంటో కానీ.. బన్నీ ఇంటికి వెళ్లిన మంచు లక్ష్మి, అల్లు అర్హతో మాట్లాడుతున్న వీడియో సోషల్ మీడియాలోకి వచ్చింది. బన్నీనే ఆ వీడియోను రికార్డ్ చేయడం విశేషం. 

అందులో అల్లు అర్హ.. మంచు లక్ష్మిని ఉద్దేశించి నువ్వు తెలుగేనా అని అడిగింది. నేను తెలుగే, నీతో తెలుగులోనే కదా మాట్లాడుతున్నా.. ఎందుకు అలా అడిగావు అని మంచు లక్ష్మి ప్రశ్నిస్తే.. నీ యాక్సెంట్ ఎందుకు అలా ఉంది అంటూ కౌంటర్ వేసింది అర్హ. మరి నీ యాక్సెంట్ కూడా నాలాగే ఉంది కదా అంటూ.. మంచు లక్ష్మి అర్హను అడిగితే తను నవ్వేసింది. బన్నీ కూడా గట్టిగా నవ్వాడు వీళ్లిద్దరి సంభాషణ చూసి. ఈ క్యూట్ వీడియో ప్రస్తుతం సోషల్ మీడియాలో వైరల్ అవుతోంది.