OTT కంటెంట్ ఓవర్ లోడ్ అవుతోంది

చూస్తుంటే థియేటర్లలో తక్కువ ఓటిటిలో ఎక్కువ సినిమాలు, సిరీస్ లు రిలీజవుతున్న పరిస్థితి కనిపిస్తోంది. దీంతో ఏది చూడాలో ఏది వదలేయాలో అర్థం కాని అయోమయంలో ప్రేక్షకులు రివ్యూల మీద ఆధారపడాల్సిన పరిస్థితి తలెత్తుతోంది. ఈ వీక్ లిస్టు చూస్తే ఇలా ఎందుకు అనాల్సి వచ్చిందో అర్థమవుతుంది. నెట్ ఫ్లిక్స్ లో ‘తమ్ముడు’ వచ్చేసింది. థియేటర్లలో దారుణంగా బోల్తా కొట్టిన ఈ మూవీని రెగ్యులర్ ఆడియన్స్ మిస్సయ్యారు. డీసెంట్ టాక్ తెచ్చుకున్న సిద్దార్థ్  ‘3 బిహెచ్కె’ అమెజాన్ ప్రైమ్ లో స్ట్రీమింగ్ అవుతోంది. సుహాస్ ‘ఓ భామ అయ్యో రామా’ని డిజిటల్ జనాలు ఆదరిస్తారేమోనని నిర్మాతలు ఎదురు చూస్తున్నారు.

తెలుగు డబ్బింగ్ తో పాటు అన్ని మెయిన్ లాంగ్వేజెస్ లో ‘సితారే జమీన్ పర్’ యూట్యూబ్ లో కేవలం 100 రూపాయలకు అందుబాటులోకి వచ్చేసింది. అమీర్ ఖాన్ కోసం చూసేవాళ్లు పెద్ద ఎత్తున ఉంటారని ఒక అంచనా. విమర్శకుల ప్రశంసలు అందుకున్న తమిళ కోర్ట్ రూమ్ డ్రామా ‘సట్టముం నీతియుమ్’ ని కొంత ఆలస్యంగా అయినా టాలీవుడ్ ఫ్యాన్స్ కోసం అనువాదం చేసి జీ ఫైవ్ లో స్ట్రీమింగ్ చేస్తున్నారు. నిన్నటి దాకా పే పర్ వ్యూ మోడల్ లో మాత్రమే అందుబాటులో ఉన్న ‘హౌస్ ఫుల్ 5 ఏబి’ వెర్షన్లు ఇవాళ్టి నుంచి సబ్స్క్రైబర్స్ అందరికీ అందుబాటులోకి వచ్చేశాయి.

ఈటీవీ విన్ లో ‘రెడ్ శాండల్ వుడ్’ నిన్నటి నుంచే అందుబాటులోకి వచ్చేసింది. ఇవి కాకుండా పదిహేనుకు పైగా వివిధ సిరీస్ లు ఇంటర్నేషనల్ కంటెంట్లు వేర్వేరు ఓటిటిల్లో రిలీజయ్యాయి. ఓపిగ్గా వెతుక్కుని టైం పెట్టుకోవాలే కానీ కాలక్షేపానికి ఢోకా లేకుండా ఎన్నో ఆప్షన్లు మూవీ లవర్స్ కు ఇప్పుడున్నాయి. కాకపోతే కన్ఫ్యూజ్ అయ్యేలా అందరూ ఒకేసారి శుక్రవారమే కంటెంట్ ని రిలీజ్ చేయడం వ్యూస్ మీద ప్రభావం చూపిస్తోంది. అలా కాకుండా వీక్ డేస్ లో కూడా రిలీజులు ప్లాన్ చేసుకుంటే ఉభయకుశలోపరిగా ఉంటుంది. థియేటర్లకు పోటీగా ఇలా గంపగుత్తగా రావడం వల్ల అనవసరమైన అయోమయం ఏర్పడుతోంది.