బుల్లితెరపై కొనసాగుతున్న ‘రాజా’ మేజిక్

కొన్ని బ్లాక్ బస్టర్ సినిమాలకు కాల దోషం ఉండదు. ఎన్ని దశాబ్దాలు గడిచినా, తరాలు మారినా వాటి ప్రభావం పెరుగుతుంది తప్ప తగ్గదు. వాటిలో వెంకటేష్ ‘రాజా’ని ప్రత్యేకంగా చెప్పుకోవచ్చు. ఎప్పుడో 27 సంవత్సరాల క్రితం 1999లో రిలీజైన ఈ మూవీ ఇప్పటిదాకా ఎన్నిసార్లు శాటిలైట్ ఛానల్స్ లో టెలికాస్టయ్యిందో లెక్క చెప్పడం కష్టం. ఇటీవలే మరోసారి ప్రసారం చేసినప్పుడు వచ్చిన టిఆర్పి రేటింగ్స్ చూసి తలలు పండిన విశ్లేషకులు సైతం ఆశ్చర్యపోయారు. అర్బన్, రూరల్ కలిపి ఏకంగా 5.5 నమోదు చేసింది. ఇటీవలే వచ్చిన ఒక స్టార్ హీరో వరల్డ్ ప్రీమియర్ కు ఇంత రేటింగ్ రాకపోవడం గమనించాల్సిన విషయం.

అంతగా రాజాలో ఏముందంటే కారణాలు వంద చెప్పొచ్చు కానీ సింపుల్ గా ఒక క్లీన్ ఎంటర్ టైనర్ కి ప్రజల్లో దక్కిన స్థానమని చెప్పొచ్చు. తమిళ సూపర్ హిట్ ‘ఉన్నడతిల్ ఎన్నై కొడుతేన్’ రీమేక్ గా రూపొందిన ఈ ఎమోషనల్ డ్రామాలో వెంకటేష్, సౌందర్య జంట ఆడియన్స్ మనసులను నేరుగా తాకింది. ఒక దొంగ ఆటో డ్రైవర్ గా మారి, అందరూ ఉన్నా అనాథగా మిగిలిన ఒక అమ్మాయిని గొప్ప స్థాయికి చేర్చే కథను దర్శకుడు ముప్పలనేని శివ తెరకెక్కించిన విధానం సిల్వర్ జూబ్లీ ఆడించింది. తెలుగు నేటివిటీకి తగ్గట్టు చేసుకున్న మార్పులు గొప్పగా కుదిరాయి. ఎస్ఏ రాజ్ కుమార్ సంగీతం గురించి ఎంత చెప్పినా తక్కువే.

ఓటిటి జమానాలో శాటిలైట్ ఛానల్స్ లో సినిమాలు చూసేవాళ్ళు బాగా తగ్గిపోయారు. ఒకప్పుడు 29 దాకా వచ్చిన రేటింగ్స్ ఇప్పుడు 10 కూడా అందుకోవడం లేదు. యాడ్స్ లేకుండా నెట్ ఫ్లిక్స్, ప్రైమ్, హాట్ స్టార్ లాంటి ప్లాట్ ఫార్మ్స్ లో సినిమాలు చూడటం అలవాటయ్యాక టీవీ ఛానల్స్ పెట్టేవాళ్ళు తగ్గిపోయారు. అలాంటిది రెండున్నర దశాబ్దాల వెనుకటి మూవీకి ఇంత ఆదరణ దక్కడం విశేషమే. అన్నట్టు ఈ రాజా ఉచితంగా యూట్యూబ్ లో కూడా ఉంది.అయినా సరే 5.5 రేటింగ్ అంటే సగటు మధ్య తరగతి ఇళ్లలో ఈ సినిమా ఎంతగా చొచ్చుకుపోయిందో అర్థం చేసుకోవచ్చు. రీరిలీజ్ చేస్తే బెటరేమో.