మోనికా… కావాల‌య్యాను మించేలా ఉంది

ఒక‌ప్పుడు ఐటెం సాంగ్స్ కంపోజ్ చేయాలంటే దేవిశ్రీ ప్ర‌సాద్ త‌ర్వాతే ఎవ‌రైనా అన్న‌ట్లుండేది. కానీ ఇప్పుడంతా అనిరుధ్ ర‌విచంద‌ర్‌దే హ‌వా. అత‌ను మంచి ఊపున్న పాట కంపోజ్ చేసి వ‌దిలాడంటే సోష‌ల్ మీడియా షేక్ అయిపోవాల్సిందే. అత‌డి ఐటెం సాంగ్స్‌లో జైల‌ర్ కోసం చేసిన కావాల‌య్యా పాట టాప్ అని చెప్పొచ్చు. ఆ పాట ఊపే వేరు. త‌మ‌న్నా ఆ పాట‌కు అదిరిపోయే స్టెప్పులు వేయ‌డం.. చిత్రీక‌ర‌ణ కూడా వేరే లెవెల్లో ఉండ‌డంతో అది సోష‌ల్ మీడియాలో మామూలుగా వైర‌ల్ కాలేదు. రీల్స్, షార్ట్స్‌లో ఆ పాట‌కు వ‌చ్చిన ఆద‌ర‌ణ అంతా ఇంతా కాదు. 

దీన్ని కొట్టే పాట ఇంకోటి రాద‌ని అనుకున్నారంతా. కానీ ఇప్పుడు అనిరుధే కంపోజ్ చేసిన మోనికా సాంగ్ దాన్ని మించిపోయేలా క‌నిపిస్తోంది. కూలీ సినిమా నుంచి సెకండ్ సింగిల్‌గా రిలీజ్ చేసిన ఈ సాంగ్ 24 గంట‌లు తిరిగేస‌రికే సోష‌ల్ మీడియాను ఒక ఊపు ఊపేస్తోంది. ట్యూన్ మంచి ఊపుతో సాగ‌డం.. అనిరుధ్, సుభాషిణి క‌లిసి హుషారుగా పాడ‌డం.. అన్నింటికీ మించి పూజాహెగ్డే సూప‌ర్ సెక్సీ అప్పీయ‌రెన్స్.. మంచి జోష్‌తో సాగిన‌ స్టెప్పులు.. ఇలా అన్నీ ప్ల‌స్ అయి పాట ఇన్‌స్టంట్‌గా హిట్ అయిపోయింది. అప్పుడే దీని మీద బోలెడ‌న్ని ఎడిట్లు వ‌చ్చేశాయి సోష‌ల్ మీడియాలో. రీల్స్, షార్ట్స్‌లో కూడా ఈ పాట ట్రెండ్ అవ‌డం మొద‌లైంది. యూట్యూబ్‌లో వ్యూస్, లైక్స్ మోతెక్కిపోతున్నాయి. 

పూజా ఇంత హాట్‌గా క‌నిపించిన పాటలు అరుదు కావ‌డంతో ఆమె గ్లామ‌ర్ ఫ్యాన్స్ వెర్రెత్తిపోతున్నారు. కావాల‌య్యా పాట‌ను ఇది క‌చ్చితంగా అధిగ‌మించేలాగే క‌నిపిస్తోంది. ఇంకా రిలీజ్‌కు నెల‌కు పైగా స‌మ‌యం ఉంది. ఈ లోపు మోనికా పాట ఎక్క‌డికో వెళ్లిపోయేలా క‌నిపిస్తోంది. ఇప్పుడే ఇలా ఉంటే.. రేప్పొద్దున థియేట‌ర్ల‌లో ఈ పాట‌కు రెస్పాన్స్ ఏ లెవెల్లో ఉంటుందో అని చ‌ర్చించుకుంటున్నారు నెటిజ‌న్లు. సినిమాకు ఈ సాంగ్ మేజ‌ర్ హైలైట్ అవ‌డం ఖాయం. కూలీ ఆగ‌స్టు 14న ప్రేక్ష‌కుల ముందుకు రానున్న సంగ‌తి తెలిసిందే.