పవన్ సినిమాకు ఆ టైటిలేం బాగుంటుంది?

రీఎంట్రీలో మాంచి జోరుమీదున్నాడు పవర్ స్టార్ పవన్ కళ్యాణ్. ఒకటికి ఐదు సినిమాలు లైన్లో పెట్టాడు. ఈ మధ్యే దసరా కానుకగా పవన్ కొత్త చిత్రాన్ని ప్రకటించిన సంగతి తెలిసిందే. అది మలయాళ బ్లాక్‌బస్టర్ ‘అయ్యప్పనుం కోషీయుం’కు రీమేక్. సితార ఎంటర్టైన్మెంట్స్ బేనర్లో తెరకెక్కనున్న ఈ చిత్రాన్ని అయ్యారే, అప్పట్లో ఒకడుండేవాడు చిత్రాల దర్శకుడు సాగర్.కె.చంద్ర రూపొందించనున్నాడు.

కాగా ఈ సినిమాకు ‘బిల్లా రంగా’ అనే టైటిల్ పెట్టబోతున్నట్లుగా ఈ మధ్య గట్టి ప్రచారం జరుగుతోంది. కానీ అది నిజమా కాదా అన్నది ఖరారవ్వలేదు కానీ.. ఈ సినిమాకు ఆ టైటిల్ ఎంతమాత్రం బాగుండదన్నది మెజారిటీ మాట. ఇంతకుముందు చిరంజీవి, మోహన్ బాబు నటించిన మల్టీస్టారర్ మూవీకి ‘బిల్లా రంగా’ అనే టైటిల్ పెట్టారు. అది మూడున్నర దశాబ్దాల కిందటి చిత్రం. ఆ సమయానికి ఆ టైటిల్ బాగానే అనిపించింది. కానీ ఇప్పుడు ఆ పేర్లు బాగా పాతబడిపోయాయి.

పైగా ‘అయ్యప్పనుం కోషీయుం’ కథ, అందులోని పాత్రల్ని బట్టి చూసినా ఈ టైటిల్ ఆ సినిమాకు సూటవ్వదు. పవన్ చేయబోయేది సీరియస్ పోలీస్ పాత్ర. ఇందులో మరో పాత్ర సైతం సీరియస్‌గానే ఉంటుంది. ఇద్దరూ ఉన్నత స్థాయి వ్యక్తుల్లా కనిపిస్తారు. అలాంటి పాత్రకు బిల్లా, రంగా అని పేర్లు పెట్టి సినిమాకు ఆ టైటిల్ పెడితే ఏమీ బాగుండదు. ఈ మాత్రం అవగాహన దర్శక నిర్మాతలకు లేకుండా ఉండదు. కాబట్టి ఈ చిత్రానికి ‘బిల్లా రంగా’ అనే టైటిల్ పెడతారనే ప్రచారం ఇక కట్టిపెట్టేస్తే మంచిది. నిజానికి ఈ టైటిల్‌తో మంచు మనోజ్, సాయిధరమ్ తేజ్ కలిసి మల్టీస్టారర్ చేయాలన్నది ప్లాన్. ఆ ఇద్దరూ ఆ దిశగా ఆసక్తి వ్యక్తం చేశారు కూడా. కాబట్టి వాళ్లకే ఆ టైటిల్ ఇచ్చేసి వేరే వాళ్లు దాని జోలికి వెళ్లకపోతే మంచిది.