సినిమా సిటీ ఆఫ్ హైదరాబాద్.. నిజమేనా?

ఇప్పటికే హైదరాబాద్‌లో పెద్ద పెద్ద స్టూడియోలున్నాయి. అన్నింటికీ మించి రామోజీ ఫిలిం సిటీ గురించి చెప్పడానికి చాలానే ఉంది. ప్రపంచంలోనే అతి పెద్ద సినీ స్టూడియో ఇది. ఏకంగా 1600 ఎకరాలకు పైగా విస్తీర్ణంతో గిన్నిస్ బుక్‌లోకి కూడా ఎక్కింది. ఐతే దాన్ని తలదన్నేలా ప్రభుత్వం తరఫున ఫిలిం సిటీ కట్టబోతున్నట్లు తెలంగాణ ముఖ్యమంత్రి కేసీఆర్ సంకేతాలివ్వడం విశేషం. ఇంతకుముందు కూడా ఆయన ఈ ‘సినిమా సిటీ’ గురించి చెప్పారు. ఐతే సినీ రంగం గురించి తాను మాట్లాడే సందర్భంలోనో.. లేక తనను సినిమా వాళ్లెవరైనా కలిసినప్పుడో సీఎం కేసీఆర్ ఇలాంటి ఘనమైన ప్రకటనలు ఇవ్వడం మామూలే. కేసీఆర్ అనే కాదు.. చాలామంది పాలకులు ఇలాగే వివిధ రంగాల వాళ్లను కలిసినపుడు వారిని ఊరడించేలా ప్రకటనలు చేస్తుంటారు.

తాజాగా మెగాస్టార్ చిరంజీవి, కింగ్ నాగార్జున తదితరులు సినీ రంగం తరఫున వరద సాయం చెక్కులను ఇచ్చేందుకు గాను ముఖ్యమంత్రిని కలిశారు. ఈ సందర్భంగా టాలీవుడ్ జనాలు పొంగిపోయే మాటలు చెప్పారు కేసీఆర్. “ఇప్పుడున్న వాతావరణానికి తోడు ప్రభుత్వం సినిమా సిటీ ఆఫ్ హైదరాబాద్ నిర్మించాలనే తలంపుతో ఉంది. ప్రభుత్వం 1500-2000 ఎకరాల స్థలాన్ని సేకరించి ఇస్తుంది. అందులో అధునాతన సాంకేతిక నైపుణ్యంతో, భవిష్యత్తు అవసరాలకు తగ్గట్టు అంతర్జాతీయ స్థాయిలో స్టూడియోలు నిర్మించుకునేందుకు సినిమా నిర్మాణ సంస్థలకు స్థలం కేటాయిస్తుంది. ఎయిర్ స్ట్రిప్‌తో పాటు అన్ని రకాల మౌలిక సదుపాయాలను ప్రభుత్వం కల్పిస్తుంది” అంటూ ఘనంగా ప్రకటించారు కేసీఆర్.

ఐతే హైదారాబాద్ చుట్టూ భూమికి ఉన్న డిమాండ్ ఏంటో ప్రత్యేకంగా చెప్పాల్సిన పని లేదు. అలాంటిది 1500-2000 ఎకరాల స్థలాన్ని సినీ పరిశ్రమ కోసం కేటాయించి కొత్తగా ఓ ఫిలిం సిటీని ప్రభుత్వం నిర్మిస్తుందని అంటే నమ్మశక్యంగా అనిపించడం లేదు. నిజంగా ఇది కార్యరూపం దాల్చితే అద్భుతమే అనుకోవాలి.