అద్దంలో చూసుకుని ఏడ్చిన హీరోయిన్

హీరోయిన్నాక ఎప్పుడూ ఫిజిక్ మెయింటైన్ చేస్తూ గ్లామరస్‌గా కనిపిస్తూ ఉండాలి. వాళ్ల కెరీర్ మామూలుగా ఎన్నో ఏళ్లు సాగదు. అందులో లుక్ పరంగా ఏ చిన్న తేడా వచ్చినా ప్రేక్షకుల దృష్టి పక్కకు మళ్లుతుంది. అవకాశాలు తగ్గిపోతాయి. నిరంతరం ఫిజిక్ మెయింటైన్ చేయలేక, లుక్ తేడా కొట్టి చాలా వేగంగా ఫేడవుట్ అయిపోయిన హీరోయిన్లు చాలామందే ఉన్నారు.

బాల నటిగా ‘చిన్నారి పెళ్ళికూతురు’ సీరియల్‌తో ఆకట్టుకుని.. ‘ఉయ్యాల జంపాల’ సినిమాతో అరంగేట్రంలోనే అదరగొట్టిన అవికా గోర్ పరిస్థితి కూడా దాదాపు ఇలాగే అయింది. టాలీవుడ్లో డెబ్యూతోనే ప్రామిసింగ్‌గా అనిపించిన అవికా.. ఆ తర్వాత ‘సినిమా చూపిస్త మావ’, ‘ఎక్కడికి పోతావు చిన్నవాడా’ లాంటి హిట్ సినిమాల్లో నటించింది. కానీ ఉన్నట్లుండి ఆమె ఇండస్ట్రీ నుంచి అంతర్ధానం అయిపోయింది.

హిట్లు వస్తున్నా కూడా అవికాకు అవకాశాలు ఆగిపోవడానికి కారణం ఆమె లుక్ తేడా కొట్టడమే. బాగా లావై షేప్ ఔట్ కావడంతో అవికాను పట్టించుకోవడం మానేశారు. ఈ విషయంలో తనలో తాను ఎంతో వేదన అనుభవించినట్లు అవికా తాజాగా ఒక ఇంటర్వ్యూలో వెల్లడించింది.

‘‘గత ఏడాది ఒక రోజు రాత్రి అద్దంలో నన్ను నేను చూసుకుంటే చాలా బాధేసింది. ఏడ్చేశాను. ఆ క్షణాలను ఎప్పటికీ మర్చిపోలేను. అప్పుడు నా శరీరం నాకు అస్సలు నచ్చలేదు. దానికి నేను తగినంత గౌరవం ఇవ్వలేదు. అందుకే లావైపోయా. నా శరీర ఆకృతి విషయంలో ఎన్నోసార్లు బాధపడ్డాను. ఇలాంటి ఎన్నో ఆలోచనలు నాకు మనశ్శాంతి లేకుండా చేశాయి. అయితే ఏదీ ఒక్క రాత్రిలోనే మారిపోదని అర్థం చేసుకున్నాను. మంచి ఆహారం, వర్కవుట్ల మీద దృష్టి సారించాను. ఎన్ని ఎదురు దెబ్బలు తగిలినప్పటికీ నేను ఆగలేదు. నా చుట్టూ ఉన్న వాళ్లు కూడా నాకు సహాయం చేశారు. నేను మారాను. ఈ రోజు మళ్లీ అద్దంలో చూసుకుని ఎంతో అందంగా ఉన్నావని నాకు నేను చెప్పుకున్నా’’ అని అవికా చెప్పింది. అయితే లుక్ మార్చుకున్నప్పటికీ తెలుగులో అయితే అవికాకు అవకాశాలు లేనట్లే ఉంది. ఆమె కెరీర్ మళ్లీ ఎప్పుడు పుంజుకుంటుందో చూడాలి.