మ‌న వ‌ర్షం సినిమాను ఎన్ని మ‌లుపులు తిప్పుతున్నారో..

ద‌శాబ్దంన్న‌ర కింద‌ట తెలుగులో సూప‌ర్ హిట్ట‌యిన సినిమా వ‌ర్షం. ఆ చిత్రం ప‌లు భాష‌ల్లో రీమేక్ అయింది. తెలుగులో వ‌చ్చిన 12 ఏళ్ల త‌ర్వాత ఈ చిత్రం హిందీలో బాగి పేరుతో రీమేక్ కావ‌డం విశేషం. ఐతే తెలుగు వెర్ష‌న్‌తో పోలిస్తే పూర్తిగా స్టైల్ మార్చి హిందీలో సినిమా తీశారు. ఈ చిత్రంతోనే టైగ‌ర్ ష్రాఫ్ స్టార్ అయ్యాడు. అందులో మ‌న సుధీర్ బాబు విల‌న్ పాత్ర పోషించిన సంగ‌తి తెలిసిందే.

ఈ సినిమాకు మిక్స్డ్ రివ్యూస్ వ‌చ్చినా స‌రే.. క‌లెక్ష‌న్ల‌కు ఢోకా లేక‌పోయింది. సినిమా హిట్ట‌యింది. దీంతో దీన్నొక ఫ్రాంఛైజీగా మార్చేసి వ‌రుస‌గా సినిమాలు తీసేస్తున్నారు. క్ష‌ణం లాంటి క్లాస్ థ్రిల్ల‌ర్ మూవీని పూర్తిగా మాస్ యాక్ష‌న్ మూవీగా మార్చేసి బాగి-2 తీశారు. దానికీ వ‌సూళ్లు బాగానే వ‌చ్చాయి. దీంతో ఇంకో సీక్వెల్ లైన్లో పెట్టారు. అదే బాగి-3.

ఈసారి కూడా రీమేక్ సినిమానే ఎంచుకుని దానికి డిఫ‌రెంట్ ట‌చ్ ఇచ్చారు. త‌మిళంలో విజ‌య‌వంత‌మైన వేట్టై చిత్రానికి చిత్ర విచిత్ర‌మైన మార్పులు చేసి బాగి-3గా వ‌దిలితే దానికీ వ‌సూళ్ల విష‌యంలో ఢోకా లేక‌పోయింది. ఇప్పుడీ సిరీస్‌లో కొత్త సినిమాను అనౌన్స్ చేశారు ద‌ర్శ‌క నిర్మాత‌లు అహ్మ‌ద్ ఖాన్, సాజిద్ న‌డియాడ్ వాలా.

ఈ ఏడాది చివ‌ర్లోనే బాగి-4 ప‌ట్టాలెక్క‌బోతోంది. టైగ‌ర్ ష్రాఫే హీరో. ఇది కూడా పూర్తి స్థాయి యాక్ష‌న్ మూవీనే అని ప్ర‌త్యేకంగా చెప్పాల్సిన ప‌ని లేదు. ఈసారి కూడా ఏదో భాష‌లో ఒక రీమేక్ మూవీనే ఎంచుకుని ఉంటారు. దాని రూపురేఖ‌లు మార్చేసి బాగి-4 అంటారు. సినిమా రిలీజయ్యే ముందు వ‌ర‌కు ఆ రీమేక్ ఏది అన్న‌ది చెప్ప‌రు. రిలీజ‌య్యాక ఒరిజిన‌ల్ తీసిన వాళ్లు చూసి షాక‌వ్వ‌డ‌మే ఉంటుంది. మ‌న వ‌ర్షం రీమేక్‌తో మొద‌లైన ప్ర‌యాణం ఇన్ని మ‌లుపులు తిరుగుతుండ‌టం విశేష‌మే.