క్రిష్‍ చేసి చూపించాడు!

గౌతమిపుత్ర శాతకర్ణి, మణికర్ణిక లాంటి పీరియడ్‍ వార్‍ డ్రామాలనే క్రిష్‍ చాలా వేగంగా పూర్తి చేసాడు. మామూలుగా అలాంటి సినిమాలు తీయడానికి రాజమౌళి లాంటి దర్శకులైతే మూడు, నాలుగేళ్లకు పైగా, వేరే దర్శకులయితే కనీసం ఏడాదిన్నర సమయం తీసుకుంటూ వుంటారు. కానీ క్రిష్‍ వర్కింగ్‍ స్టయిల్‍ చాలా డిఫరెంట్‍గా వుంటుంది. ఏమి చేయాలనేది ముందే షాట్‍ టు షాట్‍ ప్లాన్‍ చేసేసుకుని, రోజుకి ఎంత భాగం షూట్‍ చేయాలనేది కూడా ఖచ్చితంగా అనుకుని సెట్స్ మీదకు వెళతాడు. అందుకే ఎంతటి భారీ చిత్రమయినా కానీ క్రిష్‍ దర్శకత్వంలో ఇట్టే పూర్తయిపోతుంది.

అంతటి భారీ చిత్రాలనే అంత తక్కువ టైమ్‍లో తీసేసే క్రిష్‍ ఇక ఒక మామూలు చిన్న సినిమాకు ఎక్కువ సమయం ఎందుకు కేటాయిస్తాడు? వైష్ణవ్‍ తేజ్‍, రకుల్‍ ప్రీత్‍తో క్రిష్‍ రూపొందిస్తోన్న చిత్రం కోసం కేవలం ముప్పయ్‍ అయిదు రోజుల వర్కింగ్‍ డేస్‍ పెట్టుకున్నారు. అంత త్వరగా చిత్రీకరించడం, అది కూడా కరోనా కోరలు చాస్తోన్న సమయంలో పూర్తి చేయడం జరిగేది కాదని భావించారు. కానీ క్రిష్‍ అనుకున్నట్టుగా ముప్పయ్‍ అయిదు రోజుల్లో షూటింగ్‍ పనులు పూర్తి చేసేసాడు. ఇక పోస్ట్ ప్రొడక్షన్‍, గ్రాఫిక్స్ పనులు మాత్రం బ్యాలెన్స్ వున్నాయి. వాటిని కూడా పూర్తి చేసేసి థియేటర్లు మామూలుగా రన్‍ అయ్యే టైమ్‍కి రిలీజ్‍ ప్లాన్‍ చేసేసుకోవచ్చునట.