‘పులిరాజు’ ఫోటో వెనుక అసలు కథ

ఒక్కోసారి ఛాయాచిత్రాలు పెద్ద కథలు చెబుతాయి. నిన్న సందీప్ రెడ్డి వంగా అలాంటి చర్చకే చోటిచ్చారు. తన ఆఫీస్ తాలూకు ఫోటో ఒకటి సోషల్ మీడియాలో షేర్ చేశాక దాని మీద అభిమానుల్లో చర్చ జరిగింది. బోలెడు ఇంగ్లీష్ సినిమా పోస్టర్లు ఉన్నప్పటికీ ప్రధాన ఆకర్షణగా నిలిచింది మాత్రం చిరంజీవి కోపంతో ఇచ్చిన ఎక్స్ ప్రెషన్ పిక్.

ఇందులో చాలా విశేషాలున్నాయి. 1987లో ఆరాధన వచ్చింది. సుహాసిని హీరోయిన్, దర్శకుడు భారతీరాజా. తమిళ సూపర్ హిట్ కడలోర కవితైగల్ రీమేక్. అక్కడ బాగా ఆడినా తెలుగులో డిజాస్టరయ్యింది. ఇళయరాజా పాటలు ఆడియో పరంగా ఛార్ట్ బస్టరే కానీ మెగా ఫ్లాప్ ని కాపాడలేకపోయాయి.

చిరు బ్లాక్ బస్టర్స్ బోలెడు ఉండగా సందీప్ వంగా దీని ఫోటోనే ఎందుకు పెట్టుకున్నాడనే సందేహం రావడం సహజం. అదెలాగో చూద్దాం. ఆరాధనలో చిరంజీవి పాత్ర పేరు పులిరాజు. పొగరు, కోపం అణువణువు నిండిపోయి ఉంటాయి. ఇతని ప్రవర్తన ఏ స్థాయిలో ఉంటుందంటే కన్నతల్లిని సైతం తూలనాడేంత.

అలాంటి వ్యక్తి జీవితంలో జెన్నిఫర్ అనే టీచర్ వస్తుంది. పులిరాజు క్షణికంలో చేసిన తప్పుకు చాచి చెంప మీద కొడుతుంది. ఆ సందర్భంలో ఆగ్రహంతో రగిలిపోయే చిరు ఇచ్చే హావభావమే సందీప్ వంగ పెట్టిన ఫోటో. కేవలం ఒక్క సెకండ్ మాత్రమే కనిపించే ఎక్స్ ప్రెషన్ ని అలా ఫ్రేమ్ గా పెట్టుకున్నాడు.

సందీప్ వంగా హీరోలు సౌమ్యంగా ఉండరు. అర్జున్ రెడ్డి, యానిమల్ లో అదే ఋజువయ్యింది. పులిరాజు కూడా అదే బాపతు. సినిమా ఆడకపోయినా ఆ క్యారెక్టరైజేషన్, మెగాస్టార్ నటన వంగాను మైమరిచిపోయేలా చేశాయి. తనకు ఇష్టమైన మాస్టర్ సినిమా సీన్ లో చిరు ఏ చొక్కా వేసుకున్నాడో దాని రంగుతో సహా గుర్తు పెట్టుకున్న వైనం ఇంటర్వ్యూ రూపంలో వైరలయ్యింది.

ఇంతగా ఇష్టపడే సందీప్ వంగా నిజంగా చిరంజీవితో ఒక సినిమా చేస్తే ఎలా ఉంటుందో ఊహించుకోవడం కష్టమే. స్పిరిట్ స్క్రిప్ట్ పూర్తి చేసుకుని ప్రభాస్ డేట్స్ కోసం ఎదురు చూస్తున్న సందీప్ వంగా ఎంత లేదన్నా ఒక రెండేళ్లు దానికే అంకితం కాబోతున్నాడు.