పుష్ప-2 బాక్సాఫీస్ : బాహుబలి రికార్డు బ్రేక్ అయ్యేనా??

ఓ వైపు సంధ్య థియేటర్ గొడవ ఎంత ముదురుతున్నా కూడా పుష్ప 2 కలెక్షన్లు మాత్రం తగ్గడం లేదు. శనివారం అసెంబ్లీలో సీఎం రేవంత్ రెడ్డి మాట్లాడిన విధానం అందరిని ఆశ్చర్యం కలిగించింది. ఇక బన్నీ అదే రాత్రి వివరణ ఇవ్వగా విషయం దేశమంతా హాట్ టాపిక్ గా మారింది. ఈ గొడవ ఎలా ఉన్నా కూడా పుష్ప 2 సౌండ్ నేషనల్ వైడ్ గా వైరల్ అవుతోంది. ఇక ఆదివారం కూడా కలెక్షన్లు గట్టిగానే పెరిగే అవకాశం ఉంది.

విడుదలైన 17 రోజుల్లోనే ఈ సినిమా అన్ని భాషల్లో కలిపి రూ.1500 కోట్ల గ్రాస్ కలెక్షన్లను దాటడం సినీ రంగంలో సంచలనంగా మారింది. ముఖ్యంగా హిందీ వెర్షన్‌లో ఈ సినిమా అద్భుతంగా రాణిస్తుండగా, శనివారం ఒక్క రోజే రూ.25 కోట్లు వసూలు చేసింది. తెలుగు వెర్షన్‌లో పుష్ప-2 ఇప్పటికే రూ.302.35 కోట్లను రాబట్టగా, హిందీ వెర్షన్‌లోనే రూ.652.9 కోట్లు సంపాదించింది. దేశవ్యాప్తంగా పుష్ప-2 కలెక్షన్లు రూ.1029.9 కోట్లకు చేరుకోవడం విశేషం.

శనివారం వచ్చిన ఈ వసూళ్లతో బాక్సాఫీస్ రికార్డులు తిరగరాస్తోంది. ఇక ఆదివారం వసూళ్లు మరింత పెరిగే సూచనలు కనిపిస్తున్నాయి. బాహుబలి-2 కలెక్షన్ల రికార్డుకు పుష్ప-2 అత్యంత చేరువగా ఉంది. ప్రభాస్ నటించిన బాహుబలి-2 దేశవ్యాప్తంగా రూ.1040 కోట్లను వసూలు చేసిన సంగతి తెలిసిందే. పుష్ప-2 అదే రికార్డును బద్దలు కొట్టే అవకాశముందని సినీ విశ్లేషకులు అభిప్రాయపడుతున్నారు. క్రిస్మస్, న్యూఇయర్ లాంటి సెలవుల సీజన్ కొనసాగుతున్న నేపథ్యంలో పుష్ప-2 హవా మరింత కొనసాగుతుందని టాక్.