ప్యాన్ ఇండియాలు కాదని లక్కీ భాస్కర్ చూస్తున్నారు!

కొన్నిసార్లు బాక్సాఫీస్ వద్ద బ్లాక్ బస్టర్ రికార్డులు సాధించిన సినిమాలు తీరా ఓటిటిలో వచ్చాక ఆశించిన స్పందన తెచ్చుకోలేక నీరసపడతాయి. కల్కి 2898 ఏడి వెయ్యి కోట్లు సాధించినా సరే డిజిటల్ లో మాత్రం అద్భుతాలు చేయలేదు. కానీ లక్కీ భాస్కర్ మాత్రం పేరుకు తగ్గట్టే అదృష్టాన్ని వెంటేసుకుని నెట్ ఫ్లిక్స్ లోనూ దూసుకుపోతోంది. మూడు వారాల క్రితం స్ట్రీమింగ్ మొదలుపెట్టిన దుల్కర్ సల్మాన్ మూవీ ఇప్పటిదాకా 14.9 మిలియన్ల వ్యూస్ సాధించింది. సెకండ్ వీక్ లోనే దేవరను మూడో స్థానానికి నెట్టేసి సౌత్ ఇండియా నుంచి వచ్చిన సినిమాల్లో అత్యధిక శాతం చూసిన సినిమాగా కొత్త రికార్డు నమోదు చేసింది.

డిసెంబర్ 9 నుంచి డిసెంబర్ 15 దాకా తీసుకున్న డేటా ప్రకారం లక్కీ భాస్కర్ ప్రస్తుతం గ్లోబల్ స్పాట్ లో అయిదవ స్థానంలో ఉంది. నాన్ ఇంగ్లీష్ కంటెంట్ లోని ర్యాంక్ ఇది. ఇప్పటిదాకా అత్యధిక వ్యూస్ ఉన్న వాటిలో మహారాజా 19.7 మిలియన్ల వ్యూస్ తో అగ్రస్థానంలో ఉండగా నెక్స్ట్ ప్లేస్ దక్కించుకుంది లక్కీ భాస్కరే. దేవర 9 మిలియన్లతో కొనసాగుతుండగా, కల్కి హిందీ 8 మిలియన్లు, ఇండియన్ టూ 6.8 మిలియన్లతో ఉన్నాయి. సో ప్యాన్ ఇండియా మూవీస్ కన్నా ఎక్కువ ఆదరణ లక్కీ భాస్కర్ దక్కించుకోవడం విశేషం. దెబ్బకు దుల్కర్ సల్మాన్ ఇంతకు ముందు నటించిన సినిమాలకూ డిమాండ్ వస్తోందట.

ఇదంతా దర్శకుడు వెంకీ అట్లూరి బ్రాండ్ ని పెంచేదే. ప్రస్తుతం సూర్యతో ఓకే చేయించుకునే పనిలో ఉన్న ఈ యువ దర్శకుడు తర్వాత మోక్షజ్ఞతో కూడా ఒక పెద్ద సినిమా ప్లాన్ చేస్తున్నాడట. ఇవి సితార సంస్థ భాగస్వామ్యంలోనే ఉండొచ్చు. ఒరిజినల్ మలయాళం మార్కెట్ ని వదిలేసి ఎక్కువ తెలుగు అవకాశాల మీద దృష్టి పెట్టిన దుల్కర్ సల్మాన్ దానికి తగ్గట్టే గొప్ప ఫలితాలు అందుకుంటున్నాడు, నిర్మాణంలో ఉన్న ఆకాశంలో ఒక తారకు అప్పుడే క్రేజీ ఆఫర్లు వస్తున్నాయి. రానా నిర్మాణంలో కాంతా ఇటీవలే ప్రారంభమయ్యింది. ఇంకో రెండు హిట్లు పడితే దుల్కర్ టాలీవుడ్ లో సెటిలైపోయేలా ఉన్నాడు.