షారుఖ్‌ను సైతం దాటేసిన ఆల్లు అర్జున్ : అస్సలు తగ్గేదె లే…

మొత్తానికి భారతీయ ప్రేక్షకులంతా ఎంతో ఉత్కంఠగా ఎదురు చూసిన సినిమా రానే వచ్చింది. ‘పుష్ప: ది రూల్’ గురువారమే థియేటర్లలోకి దిగింది. ముందు రోజు రాత్రి నుంచే ‘పుష్ప-2’ హంగామా మొదలైపోయింది. తొలి రోజు ఇండియాలోనే కాక ఇతర దేశాల్లో కూడా హౌస్ ఫుల్ వసూళ్లతో సాగిన ఈ చిత్రం రెండో రోజులోకి అడుగు పెట్టింది. సినిమాకు ఉన్న హైప్, వైడ్ రిలీజ్, టికెట్ల ధరలు, అడ్వాన్స్ బుకింగ్స్.. ఇవన్నీ దృష్టిలో ఉంచుకుని చూస్తే ‘పుష్ప-2’ వసూళ్ల పరంగా కొత్త రికార్డులు నెలకొల్పడం ఖాయంగా కనిపించింది.

ఆ అంచనాలకు తగ్గట్లే ఇండియన్ బాక్సాఫీస్ రికార్డులన్నీ ఈ సినిమా బద్దలు కొట్టేసింది. ఏకంగా రూ.280 కోట్లకు పైగా గ్రాస్ వసూళ్లతో ‘ఆర్ఆర్ఆర్’ పేరిట ఉన్న అత్యధిక తొలి రోజు వసూళ్ల రికార్డును ‘పుష్ప-2’ బద్దలు కొట్టేసింది. పుష్ప-2కు ఉన్న హైప్‌తో పాటు మిగతా అంశాలను కూడా పరిగణనలోకి తీసుకుని చూస్తే ఇదేమీ ఆశ్చర్యపరిచే విషయం కాదు. దీన్ని మించిన విశేషం ఇంకోటి ఉంది.హిందీలో తొలి రోజు అత్యధిక వసూళ్లు సాధించిన చిత్రంగానూ ‘పుష్ప-2’ నిలవడం విశేషం.

షారుఖ్ ఖాన్ మూవీ ‘జవాన్’ గత ఏడాది రూ.64 కోట్ల నెట్ వసూళ్లతో ఇండియాలో డే-1 అత్యధిక వసూళ్లు సాధించిన హిందీ చిత్రంగా కొత్త రికార్డు నెలకొల్పింది. ఈ రికార్డును ఒక సౌత్ మూవీ బద్దలు కొట్టడం అంటే చిన్న విషయం కాదు. ‘పుష్ప-2’ హిందీ వెర్షన్ తొలి రోజు ఇండియాలో రూ.67 కోట్ల నెట్ వసూళ్లు రాబట్టింది. ‘పుష్ప-1’ రిలీజైనపుడు మొదట హిందీలో నామమాత్రంగా రిలీజవుతున్నట్లే అనిపించింది. రిలీజ్ ముంగిట ఏమాత్రం హైప్ లేదు. కానీ విడుదల తర్వాత కథ మారిపోయింది. ఈ సినిమా కోసం హిందీ ఆడియన్స్ ఎగబడ్డారు.

ఫుల్ రన్లో రూ.80 కోట్ల దాకా వసూలు చేసి ఆశ్చర్యపరిచింది. ఐతే ఇప్పుడు పుష్ప-2 హిందీ వెర్షన్ తొలి రోజే రూ.67 కోట్ల నెట్ కలెక్షన్లతో బాలీవుడ్‌కు పెద్ద షాకే ఇచ్చింది. హిందీలో ఈ సినిమాకు ఫుల్ పాజిటివ్ రివ్యూలు రావడం, అక్కడి ప్రేక్షకులు కూడా సినిమా చూసి ఊగిపోతుండడంతో ఫుల్ రన్లో రూ.400-500 కోట్ల మధ్య కలెక్షన్లు రాబడుతుందని అంచనా వేస్తున్నారు.