‘ఆఫీస‌ర్’‌ ప‌రువు అక్క‌డ కూడా తీస్తున్నారా?

అక్కినేని నాగార్జున కెరీర్లో ఆయ‌న‌కు బాక్సాఫీస్ ద‌గ్గ‌ర‌ అత్యంత ఘోర ప‌రాజ‌యాన్ని, అవ‌మాన భారాన్ని మిగిల్చిన సినిమా అంటే ఆఫీస‌ర్ అనే చెప్పాలి. నాగార్జున‌కు శివ లాంటి మైల్ స్టోన్ మూవీని అందించిన రామ్ గోపాల్ వ‌ర్మ రెండేళ్ల కింద‌ట తెర‌కెక్కించిన ఈ చిత్రం తొలి ఆట నుంచే ప్రేక్ష‌కుల తిర‌స్కారానికి గురైంది.

బ్యాడ్ రివ్యూలు.. పేల‌వ‌మైన టాక్ ఈ సినిమా ఒక్క రోజు తిరిగేస‌రికే బాక్సాఫీస్ ద‌గ్గ‌ర క‌ళ్లు తేలేసేలా చేశాయి. ఈ సినిమాకు వ‌చ్చిన షేర్.. థియేట‌ర్ల మెయింటైనెన్స్, ప‌బ్లిసిటీ ఖ‌ర్చుల‌కే స‌రిపోయిందంటే అతిశ‌యోక్తి కాదు. మొత్తంగా కోటి రూపాయ‌ల షేర్ కూడా రాని దుస్థితి. ఈ సినిమా గురించి కానీ, వ‌ర్మ గురించి కానీ మాట వర‌స‌కు కూడా నాగ్ ఎత్త‌లేని ప‌రిస్థితి వ‌చ్చింది.

ఇక సోష‌ల్ మీడియాలో అక్కినేని అభిమానులు ఫ్యాన్ వార్స్ జోలికి వెళ్తే ఆఫీస‌ర్ ప్ర‌స్తావ‌న తెచ్చి వాళ్లు చిన్న‌బుచ్చుకునేలా చేస్తుంటారు అవ‌త‌లి అభిమానులు. ఇంత‌గా ఆఫీస‌ర్ అక్కినేని వారిని వెంటాడుతోంది. ఇలాంటి స‌మ‌యంలో ఆ సినిమా తాలూకు చేదు జ్ఞాప‌కాల్ని ఓ త‌మిళ నిర్మాత మ‌ళ్లీ గుర్తు చేస్తున్నాడు. ఆఫీస‌ర్ సినిమా హ‌క్కులు కొని వేట‌క్కార‌న్ (వేట‌గాడు) పేరుతో తమిళంలో డబ్ చేసి రిలీజ్ చేస్తున్నాడా నిర్మాత‌. తాజాగా ఈ సినిమా నుంచి ఒక పాట‌, ఫ‌స్ట్ లుక్ పోస్ట‌ర్ రిలీజ్ చేశారు కూడా.

నాగార్జున, వ‌ర్మ కాంబినేష‌న్లో వ‌చ్చిన శివ త‌మిళంలోనూ హిట్ట‌యింది. గీతాంజలి, అన్నమయ్య సినిమాలతోనూ నాగ్ అక్కడ గుర్తింపు సంపాదించుకున్నాడు. ఈ నేపథ్యంలో చెట్టు పేరు చెప్పి కాయలు అమ్మే ప్రయత్నం జరుగుతోంది. ‘శివ’ కాంబినేష‌న్ రిపీట్ అంటూ అక్క‌డ ప‌బ్లిసిటీ చేస్తున్నారు. ఈ సోష‌ల్ మీడియా కాలంలో ఆఫీస‌ర్ రిజ‌ల్టేంటో త‌మిళ జ‌నాల‌కు తెలియ‌దు. ఆఫీస‌ర్ సినిమాకు తెలుగులో పోయిన ప‌రువు చాల‌ద‌ని త‌మిళంలోనూ తీస్తారా అని ప్ర‌శ్నిస్తున్నారు అక్కినేని ఫ్యాన్స్.